سوال: السلام علیکم، مفتی صاحب ! کیا موت سے میاں بیوی کا نکاح ٹوٹ جاتا ہے، اور کیا موت کے بعد میاں بیوی کا ایک دوسرے کو دیکھنا شرعا جائز ہے؟

جواب: (۱) شوہر کے انتقال کے وقت سے عدت وفات پوری ہونے تک نکاح باقی رہتا ہے، اسی وجہ سے عورت اپنے شوہر کو غسل وکفن دے سکتی ہے اور عورت کے انتقال پر شوہر اجنبی ہوجاتا ہے۔
(۲) شوہر کے انتقال کے بعد بیوی اپنے خاوند کو دیکھ سکتی ہے، غسل وکفن دینے کی بھی اس کو شرعاً اجازت ہے، اسی طرح شوہر بیوی کے انتقال کے بعد اس کے چہرہ کو دیکھ سکتا ہے، اس کے جنازے کو کاندھا بھی دے سکتا ہے، قبر میں اتارنے کے لیے عورت کے محرم رشتہ دار ناکافی ہوں، تو بجائے کسی غیر محرم کے، شوہر اپنی بیوی کی میت کو قبر میں بھی اتار سکتا ہے، البتہ اس کے جسم پر ہاتھ لگانے اور غسل و کفن دینے کی اجازت نہیں ہے۔