سوال:
حضرت ! قرآن و حدیث کی روشنی میں رہنمائی فرمائیں کہ نکاح پڑھانے کا صحیح طریقہ کیا ہے، مزید یہ بھی رہنمائی فرمائیں کہ کون قاضی بن سکتا ہے، وکیل اور گواہ کا کیا کام ہوتا ہے، اور کیا قبول کے الفاظ تین مرتبہ کہنا ضروری ہیں؟

جواب: واضح رہے کہ بنیادی طور پر نکاح منعقد ہونے کے لئے دو باتیں ضروری ہیں:
١- ایجاب و قبول
٢- دو شرعی گواہوں کی موجودگی میں (ایجاب و قبول ہو)
یہ دونوں باتیں فرض کے درجے میں ہیں، ان کے علاوہ جتنے بھی احکام ہیں، مثلاً:
نکاح کا اعلان کرنا
نکاح مسجد میں ہونا
نکاح سے پہلے خطبہ مسنونہ پڑھنا
دلہن کی طرف سے نکاح کا وکیل ہونا وغیرہ، یہ سب احکام فرض کے درجے میں نہیں ہیں، بلکہ ان میں سے بعض مسنون، بعض مستحب اور بعض انتظامی نوعیت کے ہیں۔
ان کی رعایت کرنا نکاح میں خیر وبرکت کا سبب ہے۔
چونکہ یہ تمام امور نکاح کا قاضی اچھے طریقے سے سرانجام دیتا ہے، اس لیے اس کے ذریعے سے نکاح کے امور طے کروائے جائیں، تو بہتر ہے، البتہ اگر نکاح کے امور قاضی کے علاوہ کوئی اور اہل شخص سر انجام دیدے، تو بھی نکاح ہو جائے گا۔