سوال:
اگر کسی مرد کا طلاق دینے کا ارادہ نہیں، مگر اس کے ذہن میں بار بار غیر اختیاری یا ناپسندیدہ خیالات جیسے "میں تجھے طلاق دیتا ہوں" یا "تو طلاق یافتہ ہے" وغیرہ بغیر ارادے یا اختیار کے آتے رہیں تو کیا اس سے شرعاً طلاق واقع ہو جاتی ہے؟ براہِ کرم اس طرح کے غیر ارادی خیالات کے بارے میں اسلامی قانون (شریعت) کے مطابق حکم واضح فرمائیں۔
جواب: واضح رہے کہ طلاق کے وقوع کے لیے الفاظِ طلاق کا پایا جانا ضروری ہے، لہذا زبان سے الفاظِ طلاق ادا کیے بغیر صرف نیت کرنے، سوچنے یا طلاق کا وسوسہ آنے سے طلاق واقع نہیں ہوگی۔
۔۔۔۔۔۔۔۔۔۔۔۔۔۔۔۔۔۔۔۔۔
دلائل:
رد المحتار: (230/3، ط: ایچ ایم سعید)
(قوله: و ركنه لفظ مخصوص) هو ما جعل دلالة على معنى الطلاق من صريح أو كناية فخرج الفسوخ على ما مر...وبه ظهر أن من تشاجر مع زوجته فأعطاها ثلاثة أحجار ينوي الطلاق و لم يذكر لفظًا لا صريحًا و لا كنايةً لايقع عليه، كما أفتى به الخير الرملي وغيره۔
الأشباہ والنظائر لابن نجیم:(171/1، ط: دارالکتب العلمیۃ)
وأما الطلاق والعتاق فلا یقعان بالنیة بل لابد من التلفظ۔
واللّٰه تعالٰی اعلم بالصواب
دارالافتاء الاخلاص، کراچی