سوال: السلام علیکم ، مفتی صاحب ! ایک صاحب نے عمرہ کرتے ہوئے غلاف کعبہ کو ہاتھ لگا دیا تو اِس بدلے دم دینا ہو گا یا خیرات کرنا ہوگی ؟

جواب: آج کل حجر اسود پر خوشبو لگی ہوتی ہے ، اس لیے احرام کی حالت میں اس کو چھونا جائز نہیں ہے، اگر کسی نے احرام کی حالت میں حجر اسود کا بوسہ لیا اور اس کو چھوا  جس کی وجہ سے منہ یا ہاتھ پر خوشبو لگ گئی تو زیادہ خوشبو لگنے کی صورت میں دم لازم آئے گا اور معمولی خوشبو لگنے کی صورت میں دم تو لازم نہیں آئے گا، البتہ صدقہ فطر  (یعنی پونے دو کلو گندم یا اس کی قیمت) کے برابر صدقہ کرنا واجب ہوگا۔
اور خوشبو کے زیادہ اور کم ہونے کی مقدار کے بارے میں مختلف اقوال ہیں، بعض فقہاء نے کثرت کی حد بڑے عضو کو قرار دیا ہے، یعنی اعضائے جسم میں سے بڑے عضو پر مکمل طورپر خوشبو لگ جائے۔  اور بعض فقہاء نے ایک چوتھائی عضو کو  کثرت کی حد قرار دیا ہے ، جب کہ بعض فقہاء نے کہا ہے کہ اگر لوگ اسے زیادہ سمجھیں تو وہ کثیر ہے ورنہ قلیل ۔
مذکورہ اقوال میں  تطبیق یہ ہے کہ اگر خوشبو کی مقدار کم ہو، اور مکمل عضو پر لگالی جائے، تو بھی دم واجب ہوگا، اور کامل عضو پر نہیں لگائی، تو دم واجب نہیں ہوگا، صدقہ لازم ہوگا۔ گویا خوشبو کی مقدار کم ہو، تو کامل عضو کا اعتبار ہوگا۔ اور اگر خوشبو زیادہ ہے، تو ایک چوتھائی عضو کا اعتبار ہے، یعنی اس صورت میں ایک چوتھائی عضو پر خوشبو لگانے سے دم لازم آئے گا اور اس سے کم میں صدقہ لازم آئے گا۔