عنوان: عیسائی عورت سے زنا کے بعد نکاح کا حکم اور اس سے پیش آنے والے مفاسد

سوال: میں ایک طالب علم ہوں اور اپنے ملک سے باہر تعلیم حاصل کر رہا ہوں۔ اس دوران مجھے ایک عیسائی لڑکی سے محبت ہو گئی جو تثلیث (Trinity) پر ایمان رکھتی ہے۔ بدقسمتی سے مجھ سے اس کے ساتھ زنا کا گناہ بھی سرزد ہو گیا، اور اب مجھے اس پر شدید ندامت ہے۔
میں اس سے شادی کرنا چاہتا ہوں، لیکن اس نے مجھ سے کہا ہے کہ اگلے سال تک انتظار کروں۔ میں نے تلاش کیا تو ڈاکٹر ذاکر نائک کی ایک ویڈیو دیکھی جس میں انہوں نے کہا کہ ایسی عورت سے شادی مباح نہیں ہے (خاص طور پر جبکہ اس کے پہلے بھی تعلقات رہے ہیں) اور وہ بھی زنا کر چکی ہے۔
اب میرا سوال یہ ہے کہ مجھے کیا کرنا چاہیے؟ کیا اگر میں اس سے شادی نہیں کر سکتا کیونکہ وہ مشرکہ ہے تو کیا مجھے اس سے تعلق ختم کر دینا چاہیے؟

جواب: واضح رہے کہ زنا ایک انتہائی سنگین اور کبیرہ گناہ ہے، چنانچہ قرآن کریم میں ارشاد ہے کہ" زنا کے پاس بھی نہ پھٹکو، وہ یقینی طور پر بڑی بےحیائی اور بےراہ روی ہے۔" (سورۃ الاسراء، آیت نمبر:13)
لہذا اگر کسی سے یہ گناہ سرزد ہوجائے تو اسے چاہیے کہ وہ صدقِ دل سے اللہ تعالیٰ کے حضور توبہ کرے اور آئندہ کبھی اس گناہ کے قریب نہ جانے کا پختہ عزم کرے، بے شک اللّٰہ تعالیٰ ہی توبہ قبول کرنے والا ہے۔
جہاں تک کسی عیسائی عورت سے نکاح کا معاملہ ہے تو اس سلسلے میں شرعی حکم یہ ہے کہ اہلِ کتاب عورت سے قرآنِ کریم میں نکاح کو جائز قرار دیا گیا ہے، البتہ اس کی چند شرائط ہیں:
(1) وہ عورت کسی ایسی کتاب پر ایمان رکھتی ہو، جس کو قرآن کریم نے "کتاب اللہ" ہونا تسلیم کیا ہو، جیسے تورات، زبور اور انجیل وغیرہ اور جس نبی پر وہ کتاب نازل کی گئی تھی اس نبی پر بھی وہ ایمان رکھتی ہو۔
(2) وہ دہریت یا الحاد کی قائل نہ ہو، اگرچہ وہ تثلیث کا عقیدہ رکھنے والی ہو۔
(3) اس نے اسلام سے مرتد ہو کر نصرانی مذہب قبول نہ کیا ہو۔
ان شرائط کے پائے جانے کی صورت میں وہ اہلِ کتاب شمار ہوگی اور اس سے نکاح کرنا شرعاً جائز ہے۔
البتہ عملی اعتبار سے عیسائی عورت سے نکاح کرنے میں کئی نقصانات اور مفاسد پائے جاتے ہیں، جن کا مشاہدہ عام ہے، خصوصاً نکاح کے بعد اولاد کی تربیت اور دین کی حفاظت انتہائی دشوار ہو جاتی ہے۔ چونکہ اکثر بچے ماں کے زیرِ اثر ہوتے ہیں، اس لیے وہ انہی کا مذہب اپنا لیتے ہیں، اور والد بے بسی کے سوا کچھ نہیں کر پاتا۔ اس کے علاوہ اگر وہ عورت زنا جیسے ناجائز کام میں بھی مبتلا ہو تو ایسی عورت سے نکاح کرنا بالکل مناسب نہیں، بلکہ ایسی صورت میں بہتر یہی ہے کہ اس سے تعلّق کو بالکل ختم کر دیا جائے اور کسی پاکدامن، باحیا، دیندار مسلمان عورت سے نکاح کیا جائے، تاکہ ایک پُرسکون اور بابرکت زندگی کی بنیاد رکھی جا سکے۔