سوال: السلام علیکم، مفتی صاحب ! میں نے اور میری اہلیہ نے تین مختلف اوقات میں یہ منت مانی تھی کہ اگر ہمارا فلاں کام ہو گیا، تو گھر کی ایک خاص پتیلی میں چاول بنا کر صدقہ کریں گے۔ اب بفضل خدا ہمارا وہ کام ہو گیا ہے، پوچھنا یہ ہے کہ کیا ان تینوں منتوں کے چاول ملا کر ایک ساتھ پکا سکتے ہیں یا تین مختلف اوقات میں علیحدہ علیحدہ بنانا ضروری ہوگا؟

جواب: سوال میں ذکر کردہ صورت کے مطابق اگر میاں بیوی دونوں نے مل کر ایک ہی کام کے لیے منت مانی تھی، تو یہ منت منعقد ہوگئی ہے، لہذا اب جبکہ مطلوبہ کام خیریت سے ہو گیا ہے، تو اتنی مقدار میں چاول پکا کر خیرات کرنا لازم ہے، جتنی مقدار کو منت میں مقرر کیا تھا۔
نیز چونکہ آپ نے منت مانتے ہوئے جو الفاظ استعمال کیے ہیں، ان الفاظ میں تکرار کا معنی نہیں ہے، بلکہ اپنی مانی ہوئی منت کی تاکید ہے، لہذا مذکورہ صورت میں ایک مرتبہ ہی منت پوری کرنا ضروری ہوگا، تین مرتبہ لازم نہیں ہے۔