سوال: اگر شادی کی (Anniversary) سالگرہ نہ منائی جائے، نہ کیک کاٹا جائے اور نہ ہی گفٹ دیا جائے لیکن اس دن کہیں باہر کھانا کھانے چلے جائیں تو کیا اس کی شریعت میں گنجائش ہے؟

جواب: واضح رہے کہ سالگرہ غیر مسلموں کا طریقہ اور مغربی ثقافت کی دین ہے ، نبی کریم ﷺ نے غیروں کی مشابہت سے اجتناب کا حکم دیا ہے۔ سالگرہ منانا، کیک کاٹنا، سالگرہ کی مبارک باد دینا غیر اسلامی قوموں کے اثرات ہیں، اس لیے ایسے رسم ورواج سے بچنا چاہیے۔
بالفرض اگر کوئی شخص غیر مسلموں کی رسوم ورواج سے واقعتا نفرت رکھتا ہو اور سالگرہ کے لیے معاشرے میں رائج شدہ اہتمام اور منکرات سے پاک ایک سادہ تقریب گھر میں رکھے، جس کا مقصد رب کے حضور اس بات کا شکرانہ ہو کہ اللہ تعالیٰ نے عافیت وصحت اور عبادات کی توفیق کے ساتھ زندگی کا ایک سال مکمل فرمایا ہے تو ان قیود کے ساتھ حضرت گنگوہی رحمہ اللہ اور ہمارے بعض اکابر نے اس کی گنجائش دی ہے، لیکن ظاہر ہے کہ ہمارے عرف میں نیکی کے یہ جذبات سالگرہ منانے والوں میں سے کس کے ہوتے ہیں؟ سب ہی جانتے ہیں، لہٰذا رائج منکرات کی موجودگی میں سالگرہ منانے کے ناجائز ہونے کا ہی فتویٰ دیا جاتا ہے۔
آپ کے سوال کا جواب اسی تفصیل میں موجود ہے، چنانچہ ان سارے منکرات اور رواجوں سے بچتے ہوئے اگر کوئی آدمی شکرانہ کے طور پر یا باہمی تعلق کو مضبوط کرنے کے لیے بیوی کو کوئی هدیہ وغیرہ دیدے یا اس کو اچھا کھانا کھلادے تو اس کی گنجائش ہے، البتہ اس کو ضروری نہ سمجھا جائے اور اسے باقاعدہ رسم نہ بنایا جائے، لہذا اگر اس کے لئے کبھی کبھار ناغہ کرلیاجائے اور کبھی کبھار تاریخوں میں رد و بدل کر کے یہ کام کرلیا جائے تو اس کو ناجائز نہیں کہا جائے گا۔