سوال:
میں ایک ایسی صورتحال سے گزر رہی ہوں کہ میری شادی کو 3 سال ہو چکے ہیں۔ میں نے اپنے شوہر کی بے وفائی کئی بار اس کے فون میں دیکھی ہے، جہاں وہ دوسری عورتوں کے ساتھ نازیبا اور قربت پر مبنی چیٹس اور ملاقاتوں کی تصاویر رکھتا تھا۔ میں نے اپنی ساس اور اپنے والدین کے احترام کی خاطر خاموشی اختیار کی۔ میری فطرت ایسی ہے کہ میں جھگڑا یا ہنگامہ نہیں کر سکتی۔
تین دن پہلے میں نے یہ سب دوبارہ دیکھا، اس بار میں نے اپنی ساس کو سب کچھ بتا دیا، میرے شوہر نے نہ معافی مانگی ہے اور نہ ہی کوئی بات کی ہے، وہ اب بھی خاموش ہے۔ میری ساس نے یہ کہہ دیا کہ اس کے والد بھی ایسے ہی تھے، اور یہ کہ وہ اس سے سنجیدگی سے بات کر رہی ہیں۔ جب میں نے کہا کہ میں اپنے والدین کے گھر جانا چاہتی ہوں کیونکہ وہ تبدیل نہیں ہوگا تو انہوں نے کہا کہ یہ کوئی فیصلہ نہیں، وہ وقت کے ساتھ ٹھیک ہو جائے گا اور خود ہی ٹھنڈا ہو جائے گا وغیرہ۔
لیکن اب میں یہ سب مزید برداشت نہیں کر سکتی، میری ایک بیٹی ہے اور میں اس وقت حاملہ بھی ہوں۔ میں نے اللہ سے دعا کی ہے کہ وہ مجھے صحیح راستہ دکھائے۔ میں آپ سے بھی رہنمائی چاہتی ہوں کہ مجھے کیا کرنا چاہیے اور کس طرح درست فیصلہ کرنا چاہیے؟
شوہر کے نامحرم عورتوں کے ساتھ تعلّقات کی صورت میں بیوی کے لیے اس مشکل سے نکلنے کا حل
جواب: پوچھی گئی صورت میں اگر واقعتاً آپ کے شوہر نامحرم عورتوں کے ساتھ مذکورہ افعال کے ارتکاب میں مبتلا ہیں تو یقیناً عنداللہ وہ بہت بڑے جرم کے مرتکب ہو رہے ہیں، لہٰذا اوّلًا آپ اپنے پور شوہر کو خوفِ خدا اور آخرت یاد دلاتے ہوئے سمجھانے کی مکمل کوشش کریں، اور اس کے والدین کو اس بات پر آمادہ کریں کہ وہ سنجیدگی کے ساتھ اسے ان افعال سے باز رکھنے کے لیے ہر ممکن کوشش کریں۔
سمجھانے کے باوجود اگر پھر بھی وہ باز نہیں آتے یا اس کے والدین اس معاملے میں دل چسپی نہیں دیکھائے دیتے تو ایسی صورت میں خاندان کے معتبر لوگوں کے سامنے یہ صورتِ حال رکھ دی جائے، اور ان کے ذریعے اس مسئلے کو حل کرنے کی کوشش کی جائے، اور ساتھ ہی اس کے حل کے لیے اللہ تعالیٰ سے خصوصی دعاؤں کا سلسلہ جاری رکھا جائے۔
اللہ تعالیٰ کی رحمت سے امید ہے کہ اس طریقۂ کار کو اپنانے سے ان شاء اللہ اس معاملے کا حل بخیر و عافیت نکل آئے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
الدلائل:
القرآن الكريم: (النساء، الآية: 35)
وَإِنۡ خِفۡتُمۡ شِقَاقَ بَیۡنِهِمَا فَٱبۡعَثُوا۟ حَكَمࣰا مِّنۡ أَهۡلِهِۦ وَحَكَمࣰا مِّنۡ أَهۡلِهَاۤ إِن یُرِیدَاۤ إِصۡلَٰحࣰا یُوَفِّقِ ٱللَّهُ بَیۡنَهُمَاۤۗ إِنَّ ٱللَّهَ كَانَ عَلِیمًا خَبِیرࣰا.
واللّٰه تعالٰی اعلم بالصواب
دارالافتاء الاخلاص، کراچی