سوال: کیا فرماتے ہیں علماء کرام اس مسئلے کے بارے میں
آج کل ایک میسج چل رہا ہے کہ سامان تجارت پر زیادہ منافع لینا حرام ہے، مثلا خالد نے گاہک کو پانچ روپے کا ماسک پچاس روپے میں فروخت کیا، دونوں فریقین کی رضا مندی سے یہ بیع ہوئی، تو کیا اس منافع کو کتے اور سور کے ساتھ تشبیہ دینا درست ہے؟

جواب: شریعت مطہرہ نے کسی بھی چیز پر زیادہ سے زیادہ نفع حاصل کرنے کو حرام کے درجے میں منع نہیں فرمایا، بلکہ ہر شخص کو اپنی مملوکہ اشیاء خواہ جتنے بھی نفع پر بیچنا چاہے، اجازت دی ہے، بشرطیکہ ظلم اور دھوکہ نہ ہو، لیکن مروت، ہمدردی اور انسانی خیرخواہی کا تقاضہ یہ ہے کہ نفع کی مقدار کم، مناسب اور مارکیٹ کے مطابق رکھی جائے اور لوگوں کی ہمدردی، خیر خواہی کی غرض سے کم نفع پر بیچنا بلاشبہ باعثِ برکت و ثواب ہوگا، جبکہ اس کے خلاف معاملہ کرنے والا برکت اور رحمت سے محروم رہے گا۔

واضح رہے کہ دنیا مکافات العمل ہے، اگر یہ شخص کسی کو حد سے زیادہ مہنگی چیز بیچے گا، تو اس کو بھی آگے وہ چیز مہنگے داموں میں ملے گی، اس طرح معاشرہ میں توازن ختم ہوجائے گا، مہنگائی عام ہو جائے گی اور گرانی کی وجہ سے عام لوگوں کو تکلیف ہوگی، لہذا ایسا نہیں کرنا چاہیے۔