سوال: میاں بیوی میں آپس میں صرف بوس و کنار ہوا ہو، جبکہ جماع نہ ہوا ہو، لیکن صبح کپڑوں میں قطرے کے نشانات ہوں تو کیا غسل فرض ہوگا؟

جواب: واضح رہے کہ مرد کی شرمگاہ سے تین قسم کا پانی نکلتا ہے:
۱۔منی: وہ گاڑھا پانی جو شدتِ شہوت کے وقت نکلتا ہے اور اس میں چکناہٹ ہوتی ہے اور اس سے بچہ پیدا ہوتا ہے، اس کے نکلنے کے بعد عضومنتشر نہیں رہتا ہے اور شہوت ختم ہو جاتی ہے۔
۲۔ مذی: وہ سفید گاڑھا پانی جو شہوت کے وقت نکلتا ہے اور عام طور پر اپنی بیوی کے ساتھ ملاعبت کے وقت نکلتا ہے، اس کے نکلنے پر عموماًشہوت ختم نہیں ہوتی۔
۳۔ ودی: وہ گاڑھا پانی جو دودھ کی طرح سفید ہوتا ہے اور پیشاب کے بعد نکلتا ہے جو ایک طرح سے گاڑھا پیشاب ہوتا ہے۔
اس تفصیل کے بعد آپ کے سوال کا جواب یہ ہے کہ اگر میاں بیوی کے آپس میں بوس و کنار کے وقت ہی شرمگاہ سے پانی نکلا تو یہ مذی ہے، جس کا حکم یہ ہے کہ اس سے وضو ٹوٹ جاتا ہے، غسل واجب نہیں ہوتا ہے اور کپڑے کے جس حصے پر لگ جائے، صرف اتنے حصہ کا دھونا ضروری ہے۔
اور اگر میاں بیوی کے آپس میں بوس و کنار کے وقت ہی شرمگاہ سے پانی نہیں نکلا، بلکہ نیند سے بیداری کے بعد کپڑوں پر جو دھبہ نظر آئے، اس کے بارے میں اگر یقین ہو کہ وہ منی نہیں ہے، پھر اگر وہ دھبہ ودی کا ہے تو غسل جنابت واجب نہیں ہوتا، چاہے خواب یاد ہو یا نہ ہو۔
اور اگر وہ دھبہ مذی کا ہے اور خواب بھی یاد ہو تو غسل جنابت واجب ہوگا اور اگر خواب یاد نہ ہو تو غسل جنابت واجب نہیں ہوگا۔
اور اگر اس دھبے کے بارے میں مذی یا ودی کا شک ہو یا منی، مذی اور ودی کا شک ہو،لیکن خواب یاد ہو تو ان تمام صورتوں میں غسل جنابت واجب ہوگا۔
اور اگر صرف مذی اور ودی کا شک ہو، لیکن خواب یاد نہ ہو تو غسل جنابت واجب نہیں ہو گا۔