سوال: السلام علیکم، مفتی صاحب ! اگر کسی کے دونوں گردیں کام کرنا چھوڑ دیں، جس کی وجہ سے وہ گردہ خرید کر اپنے جسم میں اس کی پیوند کاری کرے، تو کیاشرعاً یہ درست ہے؟

جواب: واضح رہے کہ اگر گردوں کے مریض شخص کی جان کو خطرہ ہو، اور ماہر دیندار ڈاکٹر بتادیں کہ اس مرض کا کوئی متبادل علاج موجود نہیں ہے، صرف گردہ لگانے(Transplant) سے ہی اس کی جان بچ سکتی ہے، اور گردہ دینے والے شخص کے لئےبھی ایک گردے پر زندہ رہنے کے غالب امکانات موجود ہوں، تو ایسی صورت میں مریض اپنی جان بچانے کی خاطر گردہ خرید کر لگوا سکتا ہے، لیکن گردہ دینے والے کے لیے اس کی قیمت وصول کرنا جائز نہیں ہے، کیونکہ انسان اللہ تعالی کے عطا کردہ اعضاء کا خود مالک نہیں ہے، اور جس چیز کا انسان خود مالک نہ ہو، اسے فروخت نہیں کر سکتا ہے۔
نیز انسانی اعضاء دوسری اشیاء کی طرح نہیں ہیں، کہ ان کے ساتھ خرید و فروخت یا ھبہ وغیرہ کا معاملہ کیا جائے۔