سوال: کیا فرماتے ہیں مفتیان عظام اس مسئلہ کے بارے میں کہ ہمارے والد نے بچپن کی حالت میں ہماری بہن کی اجازت اور رضامندی کے بغیر ایک جگہ منگنی یعنی رشتہ کی بات کی اور کوئی ایجاب و قبول نہیں ہوا۔ آج سے تقریباً چار سال پہلے دونوں خاندانوں میں گھریلو اختلافات کی وجہ سے والد صاحب نے لڑکے والوں سے رشتہ توڑ دیا اور کسی دوسری جگہ بہن کے رشتہ کی بات کرلی۔ اب پہلے لڑکے والے زبردستی رشتہ مانگ رہے ہیں، حالانکہ اب والد اور ہم سب بہن بھائی وہاں رشتہ کرنے کے لیے تیار نہیں ہیں۔ اس سب تفصیل کے بعد آپ حضرات سے معلوم یہ کرنا ہے کہ کیا بالغہ لڑکی کی شادی اس کی رضامندی اور اجازت کے بغیر کرنا درست ہے یا نہیں؟ اور سابقہ لڑکوں والوں کا اس طرح کرنا درست ہے یا نہیں؟

جواب: بالغہ لڑکی کا نکاح اس کی رضامندی کے بغیر کرنا درست نہیں ہے۔ واضح ہو کہ اس طرح کا معاملہ وعدہ نکاح کے زمرہ میں آتا ہے، اس کو طرفین میں سے جو چاہے نکاح سے پہلے ختم کرسکتا ہے، لہٰذا لڑکی والے اس معاملہ کو ختم کررہے ہیں تو لڑکے والوں کو اصرار نکاح کا کوئی حق نہیں ہے۔