سوال: السلام علیکم، مفتی صاحب ! سنا ہے کہ نکاح کی شرائط میں سے ایک شرط یہ ہے کہ مجلس ایک ہو، تو کیا اگر ٹیکسٹ میسج کے ذریعے گواہان کی موجودگی میں مجلس ایک ہوئے بغیر ایجاب و قبول ہو تو نکاح درست ہو گا؟

جواب: واضح رہے کہ اگر نکاح کا ایجاب وقبول خط کے ذریعے یا (text message) کے ذریعے ہو، تو دو شرطوں کے ساتھ شرعا درست ہوگا:
١- جس کو خط یا میسج پہنچے وہ مرد یا عورت دو گواہوں کے سامنے خط بھیجنے والے کی طرف سے ایجاب کے الفاظ پڑھ کر سنائے، تاکہ ایجاب کے الفاظ گواہان سن لیں۔
(بشرطیکہ اس بات کی تصدیق ہو چکی ہو کہ یہ خط یا میسج واقعی اسی شخص کا ہے جو ایجاب کر رہا ہے)
٢- پھر ان سے کہے کہ تم گواہ رہو، میں نے اس ایجاب کو قبول کرلیا ہے، تو ایسی صورت میں نکاح منعقد ہو جائے گا۔
کیونکہ اس طرح کرنے سے ایک مجلس ہی میں ایجاب وقبول پایا جاتا ہے۔
ان دونوں شرطوں میں سے کوئی ایک شرط بھی نہ پائی جائے تو نکاح منعقد نہیں ہوگا، لہذا اگر کسی نے خط یا (text message) میں ایجاب کے الفاظ لکھ کر بھیجے اور اگلے نے مجلس میں گواہان کے سامنے وہ الفاظ پڑھے بغیر، انفرادی طور پر قبول کا خط یا (text message) لکھ کر بھیج دیا، تو چونکہ ایجاب وقبول کی مجلس ایک نہیں ہے، لہذا نکاح منعقد نہیں ہوگا۔
نیز واضح رہے کہ یہ طریقہ نکاح کے معروف طریقے کے خلاف ہے، جبکہ معروف طریقہ یہ ہے کہ نکاح کے وقت فریقین عقد نکاح کے وقت خود موجود ہوں، یا ان کے وکیل موجود ہوں، خطبہ مسنونہ پڑھا جائے، نکاح مسجد میں کیا جائے، تاکہ اس کی تشہیر اور اعلان وغیرہ ہو جائے۔