سوال: دانوں اور گٹھلیوں وغیرہ پر آیت کریمہ یا دیگر اذکار پڑھنے کی شرعی حیثیت کیا ہے، جبکہ حدیث کا مفہوم ہے کہ حضرت عبداللہ ابن مسعودؓ نے اس طرح عمل کرنے والے کو بدعتی قرار دیا ہے۔

جواب: واضح رہے کہ گٹھلیوں پر تسبیحات پڑھنا بالکل درست ہے، حضرت ابوہریرہؓ اور حضرت صفیہؓ سے گٹھلیوں پر تسبیحات پڑھنا ثابت ہے، آپ نے اس عمل کے بدعت ہونے کے لیے حضرت عبداللہ بن مسعودؓ کی حدیث کا جو حوالہ دیا ہے، اس کے سمجھنے میں آپ سے غلطی ہوگئی ہے، کیونکہ حضرت عبداللہ بن مسعودؓ نے اس عمل کے کرنے والے کو بدعتی نہیں کہا، بلکہ مسجد میں اس طرح کا حلقہ جما کر اجتماعى شکل میں تسبیحات کو شمار کرنے پر تنبیہ فرمائى تھى، تاکہ آئندہ اس عمل میں مزید اضافہ ہو کر کوئى بدعت کى صورت نہ بن جائے، اس لیے اس موقع پر آپؓ نے اس کے سد باب کے لیے نکیر فرمائى تھى۔