سوال: مفتی صاحب ! اگر کسی شخص کے چار شادی شدہ بیٹے ہوں اور ان میں سے تین والدین کے خدمت گار اور فرمانبردار ہوں اور ایک نافرمان ہو، والدین سے الگ ہو کر سسرال میں بیوی کے ساتھ رہتا ہو، جب کہ والدین نے نہ صرف اپنے گھر میں رہنے کیلیے جگہ دی ہے، بلکہ جائیداد میں حصہ بھی دیا ہے، جس کا کرایہ چاروں بھائی لیتے ہیں، ماں باپ نے اس خوف سے کہ ان کے مرنے کے بعد اولاد جائیداد میں سے ان کے چھوڑے ہوئے حصہ میں جھگڑا کرے گی، جائیداد میں اپنے لیے کوئی حصہ نہیں رکھا، چنانچہ پینشن کی رقم سے دونوں کا گزارہ ہوتا ہے، نافرمان بیٹے کے رویے سے دلبرداشتہ ہو کر اب والدہ کا اپنے شوہر سے کہنا ہے کہ انہیں جائیداد میں سے ان کا حصہ دے دیا جائے، تاکہ جو بچے ان کی عزت اور خدمت کرتے ہیں، وہ اپنا حصہ انہیں ھبہ کر دیں۔
اس تناظر میں سوال یہ ہے کہ کیا اب والد اپنی زندگی میں دوبارہ اپنی جائیداد میں سے اپنے اور اپنی بیوی کے لیے چاروں بیٹوں سے حصہ لے سکتے ہیں؟
یاد رہے کہ تمام جائیداد بدستور والد صاحب کے نام پر ہی ہے اور انہوں نے جائیداد بیٹوں کو منتقل نہیں کی ہے۔
نیز یہ بھی بتائیں کہ کیا والد یا والدہ اپنے کسی بیٹے یا بیٹی کو جائیداد میں سے اپنا حصہ گفٹ(ھبہ) کرسکتے ہیں؟

جواب: اگر کوئی شخص اپنی زندگی میں اپنی اولاد کو جائیداد میں سے کچھ دینا یا تقسیم کرناچاہے تو یہ ہبہ کہلاتا ہے، اور ''ہبہ'' کے لیے ضروری شرط یہ ہے کہ صرف زبانی طور پر کہنا نہ پایا گیا ہو، بلکہ عملی طور پر موہوب لہ (جس کو ہبہ کیا گیا ہے) کو مکمل قبضہ دیدیا گیا ہو، اگر جائیداد صرف زبانی طور پر ہبہ کی ہو، اور مکمل قبضہ اور تصرف کا اختیار نہ دیا ہو، تو وہ جائیداد بدستور دینے والے کی ملکیت میں رہے گی۔
صورت مسؤلہ میں چونکہ جائیداد پر قبضہ بدستور جائیداد تقسیم کرنے والے کا رہا ہے، اس لئے ہبہ تام نہیں ہوا، اس صورت میں جائیداد آپ کے والد کی ملکیت میں ہی ہے، اور انہیں اس کی از سر نو تقسیم کرنے کا حق حاصل ہے، البتہ زندگی میں اپنی اولاد کے درمیان ہبہ کرنے کا شرعی طریقہ یہ ہے کہ اپنی جائیداد میں سے اپنے لیے جتنا چاہے رکھ لے، تاکہ بوقتِ ضرورت کام آئے، اور بقیہ مال اپنی تمام اولاد میں برابر تقسیم کردے، یعنی جتنا بیٹے کو دے اتنا ہی بیٹی کو دے، نہ کسی کو محروم کرے، اور نہ ہی بلا وجہ کمی بیشی کرے، البتہ اگر وہ اولاد میں سے کسی کو معقول وجہ (مثلا اولاد میں سے کسی کی مالی حالت کمزور ہونے، زیادہ خدمت گزار ہونے، علم دین میں مشغول ہونے، یا کسی اور وجہ فضیلت کی وجہ) سے زیادہ دیتا ہے، اور اس سے دوسرے بچوں کو محروم کرنا یا نقصان پہنچانا مقصود نہ ہو، تو شرعاً وہ گناہ گار نہیں ہوگا۔