سوال: مفتی صاحب ! موجودہ حالات کے تناظر میں جب کہ ہر طرف بے روزگاری ہے، کیا قربانی کا جانور خریدنے کے بجائے وہ رقم کسی ضرورت مند یا مدرسہ یا پھر کسی فلاحی تنظیم کو دی جا سکتی ہے؟

جواب: قربانی ایک عبادت ہے اور عبادات کے بارے میں اسلام کا یہ اصول ہے کہ اُن میں اجتہاد نہیں ہوسکتا، بلکہ عبادات اُسی طریقے کے مطابق کی جائیں گی جو طریقہ نبی کریم ﷺ سے ثابت ہے، اُس طریقے سے ہٹ کر کی جانے والی عبادت پر ثواب کے بجائے پکڑ کا اندیشہ ہے۔
ارشاد باری تعالی ہے: "اور جب اللہ اور اس کا رسول کسی بات کا حتمی فیصلہ کردیں تو نہ کسی مؤمن مرد کے لیے یہ گنجائش ہے، نہ کسی مؤمن عورت کے لیے کہ ان کو اپنے معاملے میں کوئی اختیار باقی رہے۔ اور جس کسی نے اللہ اور اس کے رسول کی نافرمانی کی، وہ کھلی گمراہی میں پڑ گیا"۔ (الاحزاب، آیت نمبر :36)
قربانی کا مقصد صرف جانور ذبح کر کے گوشت کھانا یا کھلانا ہرگز نہیں، بلکہ ایک شرعی حکم کی تعمیل اور سنتِ ابراہیمی یادگار کو تازہ کرکے اپنے اندر تقوی، اخلاص، جذبہ ایثار و قربانی کو پیدا کرنا ہے۔ قرآن کریم نے خود اِس حقیقت کو اِس طرح بیان کیا ہے: " اللہ کو نہ ان (جانوروں) کا گوشت پہنچتا ہے،نہ ان کا خون، لیکن اس کے پاس تمہارا تقوی پہنچتا ہے"۔ (الحج، آیت نمبر:37)
قربانی کے ایام میں اللہ کو قربانی کے جانور کا خون بہانے سے زیادہ کوئی عمل پسندیدہ نہیں ہے، حدیث شریف میں آتا ہے: حضرت عائشہ رضی اللہ عنہا سے روایت ہے کہ رسول اللہﷺنے فرمایا: "یومِ نحر (دس ذوالحجہ) کو اللہ کے نزدیک خون بہانے (یعنی قربانی کرنے) سے زیادہ کوئی عمل محبوب نہیں، قربانی کا جانور قیامت کے دن اپنے سینگوں، بالوں اور کھروں سمیت آئے گا اور بے شک اس کا خون زمین پر گرنے سے پہلے اللہ تعالیٰ کے ہاں قبول ہو جاتا ہے، پس اس خوشخبری سے اپنے دلوں کو مطمئن کر لو"۔(سنن ترمذی،حدیث نمبر:1493)
رسول اللہ ﷺ نے فرمایا: "جس کو وسعت ہو اور وہ (قربانی کے ایام میں) قربانی نہ کرے، تو وہ ہمارے مصلی (عید گاہ) کے قریب نہ آئے"۔(سنن ابن ماجہ، حدیث نمبر:3123)
قربانی کے بجائے غریبوں کی مدد کرنے کی مثال یوں ہے کہ کوئی شخص یہ کہے کہ نماز و روزے کے بجائے صدقہ کردیا جائے تو زیادہ ثواب ہوگا، اس صورت میں غریبوں کی مدد کا ثواب ضرور ہوگا، لیکن نماز چھوڑنے کی سزا بھی ہوگی۔
خلاصہ کلام:پس معلوم ہوا کہ قربانی کے ایام میں قربانی کا جانور ذبح کر کے قربانی کرنا ضروری ہے، اس کے بدلہ میں رقم صدقہ کرنا یا کسی کی مدد کردینا کافی نہیں، ان چیزوں کے کرنے سے قربانی کا وجوب ختم نہیں ہوگا، بلکہ قربانی نہ کرنے کا گناہ ہوگا۔