سوال: مفتی صاحب ! میں دس سال سے بطور ڈرائیور گاڑی چلا رہا ہوں اور مالکان کے عجیب رویوں کی وجہ سے تنگ آکر اب اپنی ضروریاتِ زندگی پوری کرنے کے لیے ایک گاڑی خریدنا چاہتا ہوں، مگر میرے پاس صرف ایک لاکھ روپے ہے، میں نے بینک سے معلومات لی، تو پتا چلا کہ انہیں دو یا تین لاکھ ایڈوانس دینے ہونگے، پھر وہ قسط پر گاڑی دینگے۔
اس ضمن میں سوال یہ ہے کہ اگر میں انہیں ایڈوانس رقم دوں اور سات سال کی مدت پر گاڑی لوں اور مہینہ کی قسط کی ادائیگی میں تاخیر نہ ہو، تو کیا یہ جائز ہے؟
ہمارے پاس کچھ ایسے لوگ بھی ہیں، جو وقت پر پیسے بھی دیتے ہیں اور گاڑی وغیرہ بھی خریدتے ہیں اور اپنا نفع لیتے ہیں، تو کیا اس طریقہ سے گاڑی خرید سکتا ہوں؟
رہنمائی فرما دیں

جواب: قسطوں پر کسی چیز کی خریدوفروخت درج ذیل شرائط کے ساتھ جائز ہے:
1۔ اس چیز کی مجموعی قیمت باہمی رضامندی سے طے کرلی جائے، چاہے یہ قیمت نقد کے مقابلے میں زیادہ ہی ہو۔
2۔ قیمت کی وصولی کے لیے ماہانہ قسط کی مقدار اور تاریخ ادائیگی آپس میں مقرر کرلی جائے۔
3- کسی قسط کی گاہک کی طرف سے وصولی میں تاخیر یا کم ادا کرنے کی صورت میں اصل قیمت میں بطور جرمانہ اضافہ کرنے کی شرط نہ لگائی گئی ہو۔
ان شرائط کی پابندی کے ساتھ کسی بھی چیز کی قسطوں پر خریدوفروخت جائز ہے، اگر ان میں سے کوئی شرط بھی چھوٹ جائے، تو یہ خریدوفروخت جائز نہیں ہوگی۔
واضح رہے کہ غیر سودی بینک، جن کے معاملات کی نگرانی علماء کرام کر رہے ہوں، ایسے بینکوں سے اجارہ کی شکل میں کار لینے کی گنجائش ہے۔