سوال: مفتی صاحب ! ایک شخص کا انتقال ہوگیا ہے، ورثاء میں بیوہ، دو شادی شدہ بیٹیاں (جن میں سے ایک بیٹی کا والد کی زندگی میں ہی انتقال ہوگیا تھا اور اس کے ورثاء میں شوہر، دو بیٹے اور دو شادی شدہ بیٹیاں ہیں) اور ایک شادی شدہ بیٹا ہے، براہ کرم رہنمائی فرمادیں کہ ورثاء کے درمیان مرحوم کی جائیداد اور نقدی کس تناسب سے تقسیم ہوگی؟

جواب: مرحوم کی تجہیز و تکفین، قرض کی ادائیگی اور اگر کسی کے حق میں جائز وصیت کی ہو، تو ایک تہائی (1/3) میں وصیت نافذ کرنے کے بعد مرحوم کی تمام جائیدادِ منقولہ اور غیر منقولہ کو چوبیس (24) حصوں میں تقسیم کیا جائے گا، جس میں سے بیوہ کو تین (3)، بیٹے کو چودہ (14) اور بیٹی کو سات (7) حصے ملیں گے۔
اگر فیصد کے اعتبار سے تقسیم کریں:
بیوہ کو %12.5 فیصد
بیٹے کو %58.33 فیصد
بیٹی کو %29.16 فیصد ملے گا۔
واضح رہے کہ وراثت کا استحقاق مورِث کی موت کے بعد ثابت ہوتا ہے، اس لیے کسی شخص کے انتقال کے وقت اس کے جو ورثاء موجود ہوتے ہیں، وہی اس کے وارث بنتے ہیں، اس کی زندگی میں فوت ہونے والے اس کے وارث نہیں بنتے، لہذا جس بیٹی کا انتقال والد کی زندگی میں ہی ہو گیا تھا، تو والد کے ترکہ سے اس مرحوم بیٹی، اس کے شوہر اور بچوں کو کچھ نہیں ملے گا۔