سوال: میری شادی کو پانچ سال گزرچکے ہیں، ہم دونوں میاں بیوی میں بہت محبت ہے، گھر کا سارا کام کاج میں ہی کرتی ہوں، ایک مرتبہ میں نے ایک کتاب میں پڑھا، وہاں لکھا ہوا تھا کہ عورت کے ذمہ گھر کا کام کاج کرنا اور کھانا بنانا واجب نہیں ہے، سوال یہ ہے کہ کیا یہ بات درست ہے؟

جواب: واضح رہے کہ شریعتِ مطہرہ میں عورت کے ذمہ گھر کا کام کاج کرنا اور کھانا بنانا شرعی قانون کی رو سے واجب نہیں ہے، لیکن چونکہ میاں بیوی کا رشتہ ضابطوں پر قائم نہیں رہتا ہے، بلکہ رابطوں پر قائم رہتا ہے، اور اگر ضابطوں پر چلا جائے، تو بہت سی چیزیں شوہر کے ذمہ بھی واجب نہیں ہیں، اسی وجہ سے شریعتِ مطہرہ نے بعض چیزیں عورت پر دیانتاً واجب کی ہیں، جیسے گھر کا کام کاج اور کھانا بنانا وغیرہ، تاکہ خوشگوار گھریلو زندگی کی بنیادیں مضبوط طور پر استوار رہ سکیں۔