سوال: مفتی صاحب! میری دو بیویاں ہیں، میں نے سنا ہے کہ جو شخص بیویوں کے درمیان برابری نہ کرے، اس کے بارے میں سخت وعیدیں آئی ہیں، سوال یہ ہے کہ شوہر پر کن کن چیزوں میں بیویوں کے درمیان برابری کرنا لازم ہے؟

جواب: جس شخص کی دو یا دو سے زیادہ بیویاں ہوں، اس کے ذمہ چند چیزوں میں برابری کرنا لازم ہے:
(1) شب باشی میں برابری کرنا، یعنی جتنی راتیں ایک بیوی کے ساتھ رہتا ہے، اتنی ہی راتیں دوسری بیوی کے ساتھ بھی رہے، تاہم ہمبستری میں برابری کرنا ضروری نہیں ہے۔

(2) نان ونفقہ میں برابری کرنا، یعنی کھانا پینا، لباس و پوشاک، رہائش اور خرچہ میں برابری کرے۔
(3) معاملات اور برتاؤ میں برابری کرنا، یعنی اگر پہلی سے اچھا برتاؤ کرتا ہے، تو دوسری سے بھی ایسا ہی اچھا برتاؤ کرے، اور اسی طرح اگر ایک کو تحفہ دیتا ہے، تو دوسری کو بھی تحفہ دے۔
تاہم اگر سفر پر جارہا ہو، تو سفر میں برابری لازم نہیں ہے، بلکہ جس بیوی کو چاہے سفر میں ساتھ لے جاسکتا ہے، البتہ سفر میں لیجانے کے لیے بیویوں کی دلجوئی کے لیے بہتر یہ ہے کہ قرعہ اندازی کرلے، اور جس کے نام کا قرعہ نکلے، اسے سفر پر لے جائے۔