سوال: مفتی صاحب! میرا ایک دوست ہے، جو بہت پریشان ہے، اس نے مجھے بتایا ہے کہ اس کی والدہ اسے کہتی رہتی ہیں کہ "اگر تو نے فلاں کام نہیں کیا، میں تجھے اپنا دودھ نہیں بخشوں گی"، یا "تجھے میری قسم ہے تو فلاں کام کر لے"، اس قسم کی وجہ سے میرا دوست والدہ کی بات ماننے پر مجبور ہوجاتا ہے، سوال یہ ہے کہ کیا یہ قسم دینا ٹھیک ہے، اور کیا اس کے خلاف کرنے سے کفارہ آئے گا؟

جواب: "میں تمہیں اپنا دودھ نہیں بخشوں گی" یا "تمہیں میری قسم" جیسے الفاظ کہنے سے قسم معتبر نہیں ہوتی ہے، اور اگر ان قسموں کو توڑ دیا جائے، تو کفارہ بھی واجب نہیں ہوگا، البتہ اگر والدہ نے جائز بات کہی ہو، تو اس بات کا ماننا ضروری ہے، نہ ماننے کی صورت میں آپ کا دوست گناہگار ہوگا۔
واضح رہے کہ اللہ کے علاوہ کسی اور کی قسم کھانا جائز نہیں ہے۔