سوال: حضرت! جمعہ کے دن عصر کے بعد اس جگہ سے ہٹے بغیر جو درود شریف پڑھنا ہوتا ہو، اگر کوئی نماز کے بعد اسی جگہ بیٹھ کر نہ پڑھے، بلکہ نماز پڑھ کر وہاں سے چلا جائے، اور دکان یا گھر میں جاکر پڑھ لے، تو کیا اس درود شریف کی فضیلت حاصل ہو جائے گی؟

جواب: واضح رہے کہ احادیث مبارکہ میں جمعہ کے دن درود شریف پڑھنے کی ترغیب آئی ہے٬ اس لئے عصر کے وقت یا کسی بھی وقت٬ اٹھتے بیٹھتے٬ چلتے پھرتے درود شریف پڑھا جاسکتا ہے.
جہاں تک جمعہ کے دن عصر نماز کے بعد 80 مرتبہ مخصوص الفاظ کے ساتھ درود شریف پڑھنے کا تعلق ہے٬ تو اس کی فضیلت بعض ضعیف روایات سے ثابت ہے، اور جو ضعیف حدیث اپنے شرائط کے مطابق ہو٬ اس پر عمل کیا جاسکتا ہے٬ لیکن یہ کوئی فرض یا واجب نہیں ہے٬ اس لئے اسے فرض یا واجب کے درجے کا ضروری سمجھنا٬ یا نہ پڑھنے والوں پر نکیر کرنا درست نہیں.
نیز بہتر یہ ہے کہ فرض نماز پڑھنے کے بعد اسی جگہ بیٹھ کر یہ درود شریف پڑھنا چاہیے٬ کیونکہ روایت میں "قبل ان یقوم من مکانہ"یعنی "اپنی جگہ سے اٹھنے سے پہلے" کے الفاظ آئے ہیں٬ البتہ ایک روایت میں اس کی قید نہیں ہے٬ اس لئے اگر کسی وجہ سے اسی جگہ نہ پڑھ سکیں٬ تو اسے چھوڑنے سے بہتر ہے کہ دوکان وغیرہ میں یہ درود شریف پڑھ لیا جائے٬ امید ہے کہ اس طرح پڑھنے سے بھی ان شاء اللہ اس کی فضیلت حاصل ہوجائے گی.