عنوان: مصیبت اور ناگہانی آفات وغیرہ سے بچنے کے لیے صبح و شام پڑھنے کی دعائیں

سوال: السلام علیکم، مجھے صبح و شام کے تین سے پانچ جان، مال، عزت آبرو کی حفاظت کے اذکار بتا دیں جو میں خود بھی آسانی سے پڑھ سکوں اور اپنے گھر والوں کو بھی سکھا سکوں۔ جزاک اللہ

جواب: ذیل میں صبح شام کی حفاظت کی وہ دعائیں ذکر کی جارہی ہیں جو صحاح ستہ (احادیث کی چھ مشہور کتابوں) میں مذکور ہیں۔
(1) حٰم۔ تَنزِیلُ الکِتَابِ مِنَ اللّٰہِ العَزِیزِ العَلِیمِ۔ غَافِرِ الذَّنبِ وَ قَابِلِ التَّوبِ شَدِیدِ العِقَابِ ذِی الطَّولِ، لَا اِلٰہَ اِلَّا ھُوَ اِلَیہِ المَصِیْرُ o
ترجمہ: یہ کتاب اللہ کی طرف سے اتاری جا رہی ہے، جو بڑا صاحب اقدار، بڑے علم کا مالک ہے، جو گناہ کو معاف کرنے والا، توبہ قبول کرنے والا، سخت سزا دینے والا، بڑی طاقت کا مالک ہے۔ اس کے سوا کوئی عبادت کے لائق نہیں، اسی کی طرف سب کو لوٹ کر جانا ہے۔
اَللّٰہُ لَاۤ اِلٰهَ اِلَّا ہُوَۚ اَلۡحَیُّ الۡقَیُّوۡمُ ۬ۚ لَا تَاۡخُذُہٗ سِنَۃٌ وَّ لَا نَوۡمٌ ؕ لَهٗ مَا فِی السَّمٰوٰتِ وَ مَا فِی الۡاَرۡضِ ؕ مَنۡ ذَا الَّذِیۡ یَشۡفَعُ عِنۡدَہٗۤ اِلَّا بِاِذۡنِہٖ ؕ یَعۡلَمُ مَا بَیۡنَ اَیۡدِیۡهِمۡ وَ مَا خَلۡفَهُمۡ ۚ وَ لَا یُحِیۡطُوۡنَ بِشَیۡءٍ مِّنۡ عِلۡمِہٖۤ اِلَّا بِمَا شَآءَ ۚ وَسِعَ کُرۡسِیُّهُ السَّمٰوٰتِ وَ الۡاَرۡضَ ۚ وَ لَا یَـُٔوۡدُہٗ حِفۡظُهُمَا ۚ وَهُوَ الۡعَلِیُّ الۡعَظِیۡمُ
ترجمہ: اللہ وہ ہے جس کے سوا کوئی معبود نہیں، جو سدا زندہ ہے، جو پوری کائنات سنبھالے ہوئے ہے، جس کو نہ کبھی اونگھ لگتی ہے، نہ نیند۔ آسمانوں میں جو کچھ ہے ( وہ بھی) اور زمین میں جو کچھ ہے ( وہ بھی) سب اسی کا ہے۔ کون ہے جو اس کے حضور اس کی اجازت کے بغیر کسی کی سفارش کرسکے ؟ وہ سارے بندوں کے تمام آگے پیچھے کے حالات کو خوب جانتا ہے، اور وہ لوگ اس کے علم کی کوئی بات اپنے علم کے دائرے میں نہیں لاسکتے، سوائے اس بات کے جسے وہ خود چاہے، اس کی کرسی نے سارے آسمانوں اور زمین کو گھیرا ہوا ہے، اور ان دونوں کی نگہبانی سے اسے ذرا بھی بوجھ نہیں ہوتا، اور وہ بڑا عالی مقام، صاحب عظمت ہے۔ (جامع الترمذی، حديث نمبر: 2879)
فضیلت: حدیث شریف میں آتا ہے کہ رسول اللہ صلی الله عليه وسلم نے فرمایا: جو صبح کے وقت درج بالا آیتیں اور آیۃ الکرسی پڑھے گا، اس کی شام تک، اور جو شام کو پڑھے گا، اس کی صبح تک حفاظت کردی جائے گی۔
(2) مصیبت اور ناگہانی آفت وغیرہ سے بچنے کے لیے صبح اور شام تین تین مرتبہ یہ دعا پڑھیں:
بِسْمِ اللَّهِ الَّذِي لَا يَضُرُّ مَعَ اسْمِهٖ شَيْءٌ فِي الأَرْضِ وَلَا فِي السَّمَاءِ، وَهُوَ السَّمِيعُ العَلِيمُ
ترجمہ: اس اللہ کے نام سے جس کے نام کے ساتھ زمین اورآسمان کی کوئی چیز نقصان نہیں پہنچا سکتی اور وہ سننے والا جاننے والا ہے۔
فضیلت:جو شخص صبح اور شام تین تین مرتبہ یہ کلمات پڑھے گا، اسے کوئی چیز نقصان نہیں پہنچائے گی۔ (جامع الترمذی، حدیث نمبر: 3388)
(3) نبی کریم ﷺ ہر قسم کی مصیبت سے بچنے کے لیے صبح و شام تین تین مرتبہ اس دعا کے پڑھنے کا اہتمام فرماتے تھے:
اَللّٰهُمَّ إنِّي أسأَلُكَ الْعَفْوَ وَالْعَافِيَةَ فِي الدُّنْيَا وَالْآخِرَةِ، اَللّٰهُمَّ إنِّي أَسْأَلُكَ الْعَفْوَ وَالْعَافِيَةَ فِي دِيْنِي وَدُنْيَايَ وَأَهْلِي وَمَالِي، اَللّٰهُمَّ اسْتُرْ عَوْرَاتِي وَآمِنْ رَوْعَاتِي۔ ‏‏‏‏‏‏اَللّٰهُمَّ احْفَظْنِي مِنْ بَيْنِ يَدَيَّ، ‏‏‏‏‏‏وَمِنْ خَلْفِي، ‏‏‏‏‏‏وَعَنْ يَمِينِي، ‏‏‏‏‏‏وَعَنْ شِمَالِي، ‏‏‏‏‏‏وَمِنْ فَوْقِي، ‏‏‏‏‏‏وَأَعُوذُ بِعَظَمَتِكَ أَنْ أُغْتَالَ مِنْ تَحْتِي
ترجمہ: اے اللہ ! بیشک میں تجھ سے دنیا اور آخرت میں معافی اور عافیت کا سوال کرتا ہوں، اے اللہ ! میں تجھ سے اپنے دین، اپنی دنیا، اپنے اہل و عیال اور مال و دولت میں معافی اور عافیت کا سوال کرتا ہوں، اے اللہ ! میرے عیبوں کو چھپا، اور مجھے میرے خوف اور اندیشوں سے محفوظ فرما۔ اے اللہ !میرے سامنے سے بھی میری حفاظت فرما، میرے پیچھے سے بھی، دائیں سے بھی اور بائیں سے بھی، اور اوپر سے بھی، اور میں آپ کی عظمت کے ذریعے اس بات سے آپ کی پناہ مانگتا ہوں کہ میں نیچے سے ہلاک کیا جاؤں۔ (سنن ابی داؤد، حدیث نمبر: 5074)
(4) صبح و شام کے تمام کاموں میں اللہ پاک کے کافی ہو جانے کے لیے یہ دعا پڑھیں:
حَسْبِيَ اللَّهُ لَا إِلٰهَ إِلَّا هُوَ عَلَيْهِ تَوَكَّلْتُ، وَهُوَ رَبُّ الْعَرْشِ الْعَظِيمِ ( صبح و شام 7 مرتبہ)
ترجمہ: میرے لیے اللہ کافی ہے، اللہ کے سوا کوئی عبادت کے لائق نہیں، میں نے اسی پر بھروسہ کیا، اور وہ بڑے عرش کا مالک ہے۔ (سنن ابی داؤد، حدیث:5081)
فضیلت:حدیث شریف میں آتا ہے کہ جو شخص صبح و شام اس دعا کو سات مرتبہ پڑھ لے تو اللہ اس کے تمام کاموں کے لیے کافی ہوجاتا ہے، چاہے پڑھنے والا اس کے پڑھنے میں سچا ہو یا جھوٹا۔
نوٹ: مزید مختلف مواقع پر پڑھی جانے والی مسنون دعاؤں کے لیے "صحاحِ ستہ میں منقول دعائیں" کے نام سے دار الافتاء الاخلاص کی جانب سے مرتّب کردہ کتاب آپ آرڈر دے کر منگوا بھی سکتے ہیں۔