سوال:
محترم مفتی صاحب !
السلام علیکم و رحمۃ اللہ و برکاتہ، مفتی صاحب ! مامی نے پمپ کے ذریعے اپنا دودھ اپنے بچے کے لئے نکال کر فیڈر میں ڈالا اور وہ دودھ چھوٹے بھانجے نے فیڈر کو منہ لگا کر پی لیا ، اب کیا شریعی حکم ہوگا؟ رہنمائی فرمائیں۔
جواب: صورت مسئولہ میں اگر بھانجے نے مدتِ رضاعت (جو کہ احتیاطاً ڈھائی سال ہے) کے اندر مامی کا دودھ پیا ہے، تو مامی کا دودھ فیڈر کے ذریعے پینے سے بھی حرمت رضاعت ثابت ہو جائے گی، اور یہ مامی اس کی رضاعی ماں بن جائے گی، لیکن اگر اس کی عمر ڈھائی سال سے زیادہ ہے، تو دودھ پینا حرمت رضاعت کا سبب نہیں بنے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الھدایة: (کتاب الرضاع، 329/2)
قال النبی صلی اللہ علیہ وسلم: لا رضاع بعد حولین۔
مؤطا الامام محمد: (باب الرضاعة، ص: 276)
وکان أبوحنیفۃ یحتاط بستۃ أشہر بعد الحولین فیقول: یحرم ما کان في الحولین وبعدہا إلی تمام ستۃ أشہر، وذٰلک ثلاثون شہرًا، ولا یحرم ما کان بعد ذٰلک، ونحن لا نریٰ أنہ یحرم، ونریٰ أنہ لا یحرم ما کان بعد الحولین۔
رد المحتار: (211/3، ط: سعید)
لو استغني في حولین حل الإرضاع بعدہا إلی نصف ولا تأثم…. ومستحب إلی حولین وجائز إلی حولین ونصف۔
الھندیة: (344/1)
قلیل الرضاع وکثیرہ سواء عندنا.... كما يحصل الرضاع بالمص من الثدي يحصل بالصب والسعوط والوجور كذا في فتاوى قاضي خان ۔
فتاویٰ رحیمیة: (249/8، ط: دار الاشاعت)
واللہ تعالٰی اعلم بالصواب
دارالافتاء الاخلاص،کراچی