سوال:
مفتی صاحب ! نکاح کی سنتیں کیا ہیں؟ نیز نکاح کس دن اور کہاں کرنا سنت ہے؟
جواب: نکاح کامسنون طریقہ یہ ہے کہ اگر لڑکی بالغہ ہو٬ تو اس سے اجازت لے کر دو مسلمان مردوں٬ یا ایک مرد اور دو مسلمان عورتوں کو گواہ بنا کر ایسے آدمی سے اس کا نکاح کرادیا جائے٬ جو شرعی اعتبار سے اس کا کفو (ہم پلہ) ہو٬ اور نکاح کے دوران کم از کم دو مرد گواہ یا ایک مرد دو عورتوں کی موجودگی میں ایجاب وقبول ہو٬ اگر وسعت ہو تو اس موقع پر چھوہارے تقسیم کئے جائیں.
نکاح سے پہلے اعلان (تشہیر) کرنا اور شب زفاف کے بعد اسراف و فضول خرچی اور رسومات سے بچتے ہوئے حسب استطاعت ولیمہ کرنا بھی مسنون ہے٬ اسی طرح نکاح کے بعد خیر و برکت کی دعا اور مبارک دینا بھی سنت سے ثابت ہے.
مسجد میں اور جمعہ کے دن نکاح کرنا مستحب ہے٬ اسی طرح ایجاب وقبول سے پہلے خطبہ پڑھنا بھی مستحب ہے.
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
صحيح البخاري: (رقم الحدیث: 4794)
"عن أنس رضي الله عنه، قال: أولم رسول الله صلى الله عليه وسلم حين بنى بزينب بنت جحش، فأشبع الناس خبزا ولحما..."
مرقاة المفاتيح: (رقم الحدیث: 3152، 2072/5، ط: دار الفکر، الھند)
وعن عائشة قالت: قال رسول الله - صلى الله عليه وسلم : «أعلنوا هذا النكاح واجعلوه في المساجد واضربوا عليه بالدفوف» . رواه الترمذي قال: هذا حديث غريب"
قال ابن الهمام ويستحب مباشرة عقد النكاح في المسجد لكونه عبادة وكونه في يوم الجمعة"
الدر المختار: (8/3، ط: دار الفکر)
"ويندب إعلانه وتقديم خطبة وكونه في مسجد يوم جمعة بعاقد رشيد وشهود عدول"
واللہ تعالٰی اعلم بالصواب
دارالافتاء الاخلاص،کراچی