سوال: السلام عليكم ورحمة الله وبركاته،
مفتی صاحب ! سوال یہ ہے کہ ایک لڑکی ایک ماہ پہلے بالغ ہوئی، اگلے مہینے وہ عمرہ کرنے گئی، مگر لاشعوری میں اس نے عمرہ بغیر وضو کے کیا اور اپنے وطن آگئی، اس صورت میں کیا اس کا عمرہ ہوگیا ؟ نیز اس پر کیا دم واجب ہوگا؟

جواب: واضح رہے کہ طواف کےلیے وضو کرنا واجب ہے اور سعی کےلیے وضو سنت ہے، لہذا اگر کسی نے عمرہ کا طواف وسعی دونوں بے وضو کئے اور احرام سے نکل گیا تو جب تک وہ مکہ مکرمہ میں ہے، دونوں کا اعادہ کرے ( اس پر طواف کا اعادہ واجب ہے کیونکہ یہ اصل ہے اور سعی کا اعادہ افضل ہے کیونکہ وہ طواف کے تابع ہے) اور ان دونوں کا اعادہ کرلینے پر کچھ واجب نہ ہوگا۔
اسی طرح اگر طواف کا اعادہ کیا، لیکن سعی کا اعادہ نہیں کیا تب بھی صحیح یہ ہے کہ اس پر کچھ واجب نہ ہوگا، اس لئے کہ سعی کے لئے طہارت شرط نہیں ہے۔
اور اگر طواف کا اعادہ نہیں کیا اور اپنے اہل وعیال کی طرف وطن لوٹ گیا تو ترکِ واجب ( طہارت ترک کرنے کی وجہ) سے اس پر بطور دم ایک بکری واجب ہوگی، جو حدود حرم میں ذبح کی جائےگی اور اس کا عمرہ ادا ہوجائے،اور اس پر واپس مکہ مکرمہ جانا لازم نہیں ہوگا۔
لہذا صورت مسئولہ میں بے وضو عمرہ کرنے والے کا عمرہ ادا ہوگیا اور بے وضو طواف کرنے کی وجہ سے بطور دم ایک بکری ذبح کرنا واجب ہے، جس کو حدود حرم میں ذبح کرنا لازم ہے۔