سوال: السلام علیکم و رحمۃ اللہ برکاتہ
مفتی صاحب! قبرستان کی جگہ اونچی نیچی ہے، جہاں والد صاحب کی قبر ہے، اکثر پانی جمع ہو جاتا ہے۔
اور پانی کی نکاسی کا کوئی معاملہ نہیں ہے، پانی جب تک خشک نہ ہو، قبریں ڈوبی رہتی ہیں۔
ایسی صورت میں کیا ہم قبر کی اطراف میں چار دیواری کرسکتے ہیں؟
یا قبر کو اطراف سے پکا کر سکتے ہیں؟ یا چھت ڈال سکتے ہیں؟
رہنمائی فرمائیں۔

جواب: واضح رہے کہ قبر کو پختہ بنانا یا اس کے اوپر چھت تعمیر کرنا جائز نہیں ہے، البتہ صرف دائیں بائیں سے پتھر اس طرح لگادینا کہ اصل قبر (یعنی جتنے حصے میں میت دفن ہے) کچی مٹی کی ہو، اور اردگرد پتھر یا بلاک وغیرہ سے منڈیر نما بنا دیا جائے، یا معمولی سا احاطہ بنا دیا جائے، یا اردگرد زمین پر پختہ فرش کردیا جائے، تاکہ قبر کا نشان باقی رہے، اس کی اجازت ہے، بشرطیکہ سادہ پتھر استعمال کیا جائے، زیب وزینت والا پتھر نہ ہو ، نیز آگ پر پکی ہوئی اینٹیں بھی نہ لگائی جائیں۔