سوال: کیا فرماتے ہیں علمائے دین درج ذیل مسئلے میں کہ خطوط میں جو ابجد سے بسم اللہ لکھی ہوتی ہے، یہ کس کی ایجاد ہے؟اور ایسا کب ہوا؟ اور عدد سے پورے بسم اللہ کا ثواب وبرکت حاصل ہوگی؟

جواب: تحریر کی ابتداء میں "بسم اللہ الرحمن الرحیم" لکھنا مسنون ہے، لیکن یہ بات کسی مستند کتاب میں نظر نہیں آئی کہ بسم اللہ کی جگہ ٧٨٦ کا عدد استعمال کب سے لکھا جانا شروع ہوا، لیکن اس کی وجہ غالبا یہ ہے کہ بسم اللہ لکھا ہوا کاغذ کسی بے حرمتی کی جگہ استعمال ہوگا تو اس لیے بے ادبی ہوگی، لہذا اگر کوئی شخص اس خیال سے زبان سے بسم اللہ پڑھ کر یہ عدد لکھ دے تو سنت ادا ہوجائے گی، لیکن افضل یہی معلوم ہوتا ہے کہ بسم اللہ ہی لکھی جائے، کیونکہ آنحضرت صلی اللہ علیہ وسلم نے کافر بادشاہوں کو جو خطوط روانہ فرمائے، ان میں بھی بسم اللہ درج تھی۔ ظاہر ہے کہ کفار کے پاس بے حرمتی کا احتمال مسلمانوں کے مقابلے میں زیادہ تھا، مگر اس کی وجہ سے بسم اللہ لکھنا نہیں چھوڑا تھا۔