سوال: مفتی صاحب ! ہمارے والد صاحب کا انتقال ہوگیا ہے، اب ان کی میراث تقسیم کرنے کے وقت بیٹوں میں اختلاف ہو رہا ہے، اصل مسئلہ یہ ہے کہ والد صاحب جب بیمار تھے، تو ایک بیٹے نے ان کے علاج پر پیسے لگائے تھے، اب والد صاحب کے انتقال کے بعد وہ ان پیسوں کا مطالبہ کر رہے ہیں، معلوم یہ کرنا ہے کہ کیا اس بیٹے کا یہ مطالبہ ٹھیک ہے؟ اور ان کو میراث تقسیم کرنے سے پہلے یہ پیسے دینا ضروری ہیں؟ براہ کرم وضاحت فرمادیں۔

جواب: پوچھی گئی صورت میں اگر بیٹے نے قرض کی صراحت کے ساتھ والد کے علاج پر رقم خرچ کی تھی یا واپسی کے معاہدے کے ساتھ خرچ کی تھی تو میراث تقسیم کرنے سے پہلے یہ رقم مرحوم والد کی میراث سے مذکورہ بیٹے کو دی جائے گی ، اور اگر رقم قرض کی صراحت یا واپسی کے معاہدہ کے بغیر خرچ کی تھی تویہ رقم بیٹے کی طرف سے اپنے والد پر تبرع واحسان ہوگا، اس صورت میں اس رقم کو میراث سے نہیں نکالا جائے گا۔