سوال: مفتی صاحب ! حدیث میں سوتے وقت کون سی دعا پڑھنا آئی ہے؟

جواب: نبی کریم ﷺ جب بستر پر لیٹتے تو اپنا ہاتھ اپنے رخسار مبارک کے نیچے رکھتے اور یہ دعا پڑھتے:
(1) اللَّهُمَّ بِاسْمِكَ أَمُوتُ وَأَحْيَا
ترجمہ: اے اللہ! میں تیرا نام لے کر مرتا ہوں اور جیتا ہوں۔
(صحیح بخاری، باب وضع الید الیمنی تحت الخد الایمن، حدیث نمبر: 6314)
یہ دعا پڑھنا بھی ثابت ہے:
(2) اَللّٰهُمَّ إِنِّي أَعُوذُ بِوَجْهِكَ الْكَرِيمِ، وَكَلِمَاتِكَ التَّامَّةِ، مِنْ شَرِّ مَا أَنْتَ آخِذٌ بِنَاصِيَتِهِ، اَللّٰهُمَّ أَنْتَ تَكْشِفُ الْمَغْرَمَ وَالْمَأْثَمَ، اَللّٰهُمَّ لَا يُهْزَمُ جُنْدُكَ، وَلَا يُخْلَفُ وَعْدُكَ، وَلَا يَنْفَعُ ذَا الْجَدِّ مِنْكَ الْجَدُّ سُبْحَانَكَ وَبِحَمْدِكَ۔
اے اللہ ! میں ہر چیز کے شر سے جو تیرے قبضہ قدرت میں ہے، تیری کریم ذات اور تیرے کلمات تامہ کے ذریعے کر تجھ سے پناہ مانگتا ہوں، اے اللہ ! تو ہی قرض اور گناہ کو دور کرتا ہے، اے اللہ ! تیرے لشکر کو شکست نہیں دی جاسکتی، تیرا وعدہ کبھی غلط نہیں ہوتا اور تیرے ہاں کسی کی شان و شوکت اس کے کام نہیں آئے گی ، تیری ہی ذات پاک ہے اور قابلِ حمد ہے۔
(سنن أبي داؤد، بَابُ مَا يُقَالُ عِنْدَ النَّوْمِ، حدیث نمبر: 5052)
یہ دعا پڑھنا بھی منقول ہے:
(3) الْحَمْدُ لِلَّهِ الَّذِي كَفَانِي وَآوَانِي، وَأَطْعَمَنِي وَسَقَانِي، وَالَّذِي مَنَّ عَلَيَّ فَأَفْضَلَ، وَالَّذِي أَعْطَانِي فَأَجْزَلَ، الْحَمْدُ لِلَّهِ عَلَى كُلِّ حَالٍ اَللّٰهُمَّ رَبَّ كُلِّ شَيْءٍ وَمَلِيكَهُ وَإِلَهَ كُلِّ شَيْءٍ، أَعُوذُ بِكَ مِنَ النَّارِ
ترجمہ: تمام تعریفیں اللہ ہی کے لیے ہیں، جس نے میرے سب کاموں کی کفایت فرمائی، اور مجھے ٹھکانہ دیا، اور مجھے کھلایا اور پلایا اور جس نے مجھ پر احسان فرمایا اوربہت زیادہ کیا اور جس نے مجھے دیا پس خوب دیا، تمام تعریفیں اللہ ہی کے لیے ہیں، اے اللہ ! ہر چیز کے پالنے والے اور ہر چیز کے مالک اور ہر چیز کے معبود، میں دوزخ سے تیری پناہ مانگتا ہوں۔
(سنن ابي داؤد، بَابُ مَا يُقَالُ عِنْدَ النَّوْمِ، حديث نمبر: 5058)
یہ دعا بھی پڑھ سکتے ہیں:
(4) بِسْمِ اللَّهِ وَضَعْتُ جَنْبِي اَللّٰهُمَّ اغْفِرْ لِي ذَنْبِي، وَأَخْسِئْ شَيْطَانِي، وَفُكَّ رِهَانِي، وَاجْعَلْنِي فِي النَّدِيِّ الْأَعْلَى
ترجمہ: اللہ کے نام سے میں نے اپنا پہلو رکھ دیا۔ اے اللہ! میرے گناہ بخش دے، میرے شیطان کو دفع (دور) کر دے، میرے نفس کو (آگ سے) آزاد کر دے اور مجھے اعلیٰ و افضل مجلس والوں میں بنا دے۔ (ملائکہ اور انبیاء و رسل کا ہم نشین بنا دے)۔
(السنن لابی داؤد، بَابُ مَا يُقَالُ عِنْدَ النَّوْمِ، حديث نمبر: 5054)