سوال: مفتی صاحب ! عرفہ والے دن میدانِ عرفات میں کون سی دعا پڑھنی چاہیے؟

جواب: حدیث میں میدانِ عرفات میں قیام کے دوران ان کلمات کے پڑھنے کو بہترین کلمات کہا گیاہے:
(۱) لَآ اِلٰہَ اِلَّااللہُ وَحْدَہٗ لَا شَرِیْکَ لَہٗ لَہُ الْمُلْکُ وَلَہُ الْحَمْدُ وَھُوَ عَلٰی کُلِّ شَيءٍ قَدِیْرٌ
ترجمہ: اللہ کے سوا کوئی معبود نہیں، وہ تنہا ہے، اس کا کوئی شریک نہیں، بادشاہی اسی کی ہے، اور تعریف اسی کی ہے، اور وہ ہر چیز پر قادر ہے۔ (جامع الترمذی، باب فی دعاء یوم عرفۃ، حدیث نمبر: 3585)
۲) میدانِ عرفات میں یہ دعا پڑھنا منقول ہے:
حضرت علی رضی اللہ عنہ فرماتے ہیں کہ آپ ﷺعرفات کے مقام پر یہ دعا کثرت سے مانگا کرتے تھے:اَللّٰهُمَّ لَكَ الحَمْدُ كَالَّذِي نَقُولُ وَخَيْرًا مِمَّا نَقُولُ، اللَّهُمَّ لَكَ صَلاَتِي وَنُسُكِي وَمَحْيَايَ وَمَمَاتِي، وَإِلَيْكَ مَآبِي، وَلَكَ رَبِّ تُرَاثِي، اللَّهُمَّ إِنِّي أَعُوذُ بِكَ مِنْ عَذَابِ القَبْرِ وَوَسْوَسَةِ الصَّدْرِ وَشَتَاتِ الأَمْرِ، اللَّهُمَّ إِنِّي أَعُوذُ بِكَ مِنْ شَرِّ مَا يَجِيءُ بِهِ الرِّيحُ
ترجمہ: اے اللہ ! آپ ہی کی تعریف ہے، اس طرح جس طرح ہم بیان کرتے ہیں، اور اس سے کہیں بہتر جیسے ہم کہیں، اے اللہ ! آپ ہی کے لئے میری نماز، اور میری قربانی اور میرا جینا اور میرا مرنا، اور آپ ہی کی طرف ہے میرا لوٹنا، اور اے پروردگار ! آپ ہی کے لیے ہے میری میراث، اے اللہ ! میں آپ کی پناہ مانگتا ہوں عذابِ قبر سے اور سینہ کے وسوسے سے اور حال کی پراگندگی سے، اے اللہ ! میں آپ کی پناہ مانگتا ہوں اس چیز کے شر سے جو ہوا لے کر آئے۔
(جامع الترمذي، حديث نمبر: 3520)