سوال: السلام علیکم، مفتی صاحب ! فوت شدگان کی موبائل میں تصویر رکھنا اور اسے دیکھنا اور اس کو واٹس اپ کے اسٹیٹس پر لگانے کے بارے میں کیا حکم ہے؟

جواب: واضح رہے کہ بلا ضرورت شرعی جاندار کی تصویر بنانا٬ ناجائز اور حرام ہے٬ احادیث مبارکہ میں اس پر سخت وعیدیں آئی ہیں، البتہ بعض علماء کرام کے نزدیک ڈیجیٹل تصویر پر تصویر محرم (ناجائز تصویر) کے احکام لاگو نہیں ہوتے٬ جب تک اس میں کوئی اور غیر شرعی امر (مثلا غیر محرم کی تصویر بنانا وغیرہ) نہ پایا جائے، لہذا بعض علماء کرام کی اس رائے کے مطابق ڈیجیٹل تصویر موبائل میں رکھنا ناجائز تو نہیں ہوگا، البتہ چونکہ فوت شدگان کی تصویر رکھنا کوئی ضرورت کی چیز نہیں ہے، اس لئے حتی الامکان اس سے اجتناب کرنا چاہیے۔