سوال: مفتی صاحب ! جب رات کو نیند سے بیدار ہوں، تو کون سی دعا پڑھنا چاہیے؟

جواب: (1) حضرت عائشہ رضی اللہ عنہا فرماتی ہیں کہ آپ صلی اللہ علیہ وسلم جب رات میں بیدار ہوتے، تو یہ دعا پڑھتے:
لَا اِلٰہَ اِلَّا اَنْتَ سُبحَانَکَ، اَللّٰھُمَّ اَسْتَغْفِرُکَ لِذَنبِیْ، وَاَسْئَلُکَ رَحْمَتَکَ. اَللّٰھُمَّ زِدْنِیْ عِلْمًا، وَلَا تُزِغْ قَلْبِیْ بَعْدَ اِذْ ہَدَیْتَنِیْ وَھَبْ لِیْ مِنْ لَّدُنْکَ رَحْمَۃً اِنَّکَ اَنْتَ الْوَھَّابُ.
ترجمہ: تیرے سوا کوئی معبود نہیں، تو پاک ہے، اے اللہ ! میں تجھ سے اپنے گناہوں کی معافی چاہتا ہوں، اور تجھ سے تیری رحمت مانگتا ہوں۔
اے اللہ ! میرے علم میں اضافہ فرما، مجھے ہدایت دینے کے بعد میرے دل میں کجی پیدا نہ کر اور خاص اپنی طرف سے مجھ پر رحمت فرما، بے شک تو بہت زیادہ عطا کرنے والا ہے۔
(سنن لابی داؤد، باب ما یقول الرجل اذا تعار من اللیل، رقم الحدیث: 5061)
نیز رات کو اٹھ کر یہ دعا پڑھنا بھی ثابت ہے:
(2) حضرت عائشہ رضی اللہ عنہا فرماتی ہیں کہ آپ صلی اللہ علیہ وسلم جب رات میں نیند سے جاگتے، تو دس بار اَللهُ اَكبَر ( اللہ سب سے بڑا ہے) کہتے، دس بار اَلحَمدُ لِلّٰهِ ( تمام تعریفیں اللہ کے لیے ہیں) کہتے، دس بار سُبْحَانَ اللَّهِ وَبِحَمْدِهِ ( میں اللہ کی پاکی بیان کرتا ہوں، اس کی تعریف کے ساتھ) کہتے، دس بار سُبْحَانَ الْمَلِكِ الْقُدُّوسِ (پاک ہے وہ ذات جو بادشاہ ہے، تقدس کا مالک ہے۔) کہتے، اور دس بار اَستَغفِرُ اللهَ (میں اللہ سے مغفتر مانگتا ہوں) کہتے، اور دس بار لَا إِلٰهَ إِلَّا اللهُ (اللہ کے سوا کوئی عبادت کے لائق نہیں) کہتے، پھر دس بار اَللّٰهُمَّ إِنِّي أَعُوذُ بِكَ مِنْ ضِيقِ الدُّنْيَا، ‏‏‏‏‏‏وَضِيقِ يَوْمِ الْقِيَامَةِ (اے اللہ! میں تیری پناہ مانگتا ہوں، دنیا کی تنگی سے اور قیامت کے دن کی تنگی سے) کہتے، پھر نماز شروع کرتے۔
(السنن لابي داؤد، باب ما يقول إذا أصبح، رقم الحديث: 5085)