سوال: مفتی صاحب! میری بہن نے گھریلو ناچاقیوں کی وجہ سے اپنے شوہر سے حق مہر کے عوض خلع کا مطالبہ کیا، جس پر میرے بہنوئی نے 2 گواہوں کی موجودگی میں اپنی رضامندی کے ساتھ میری بہن کو خلع دے دیا اور خلع نامہ پر دستخط بھی کردیے ہیں۔
1۔ معلوم یہ کرنا ہے کہ کیا یہ خلع واقع ہوگیا ہے، اور نکاح ٹوٹ گیا ہے؟
2۔ کیا اب ہمارے بہنوئی کو رجوع کا حق حاصل ہے؟ اور اگر یہ دونوں دوبارہ ملنا چاہیں، تو اس کی کیا صورت ہے؟
3۔ اگر خلع واقع ہوگیا ہے، تو بہن کی عدت کب تک ہوگی؟
4۔ کیا میری بہن اس خلع کے بعد کسی دوسری جگہ شادی کرسکتی ہے؟

جواب: (1) واضح رہے کہ اگر خلع کی تمام شرائط کا خیال رکھتے ہوئے خلع لیا جائے، تو ایسا خلع معتبر ہوتا ہے، اور خلع سے ایک طلاقِ بائن واقع ہو کر دونوں کا آپس میں نکاح ختم ہو جاتا ہے۔
پس صورتِ مسئولہ میں ایک طلاقِ بائن واقع ہو کر دونوں کا آپس میں نکاح ختم ہو گیا ہے۔
(2) خلع کے بعد شوہر کو رجوع کا حق نہیں رہتا، البتہ خلع کے بعد دونوں دوبارہ ساتھ رہنا چاہیں، تو دونوں کو دوبارہ ساتھ رہنے کے لیے دو مرد یا ایک مرد اور دو عورتوں کی موجودگی میں نئے مہر کے ساتھ تجدیدِ نکاح کرنا پڑے گا۔
(3) اگر عورت حاملہ نہ ہو، تو خلع کے بعد عدت تین حیض ہیں، اور اگر حاملہ ہو، تو عدت وضعِ حمل یعنی (بچے کی پیدائش) تک ہوگی۔
واضح رہے کہ عدت میں عورت پر درج ذیل پابندیاں عائد ہوتی ہیں، ان کا لحاظ رکھنا ضروری ہے:
بلا ضرورتِ شدیدہ گھر سے نہ نکلے، کسی طرح کا بناؤ سنگھار نہ کرے، کوئی زیور نہ پہنے، خواہ سونے چاندی کا ہو یا کسی اور دھات کا، بدن یا کپڑوں میں کوئی خوشبو نہ لگائے، کسی قسم کا بھی تیل بدن پر بلا عذر نہ لگائے، سرمہ یا کاجل نہ لگائے، مہندی نہ لگائے، شوخ رنگ کے کپڑے نہ پہنے، نیز پردے کے حوالے سے عدت میں بھی وہی احکام ہیں، جو عام ایام میں ہیں۔
عورت پر عدت کے دوران اس کے علاوہ بہت سی چیزوں کی پابندی کے حوالے سے جو بے اصل باتیں ہمارے معاشرے میں مشہور ہیں، ان کی شریعت میں کوئی حقیقت نہیں ہے۔
(4) جی ہاں ! خلع کی عدت گزرنے کے بعد، عورت دوسری جگہ شادی کر سکتی ہے۔