سوال: السلام علیکم، ایک بالغ لڑکا عین نکاح کے وقت نکاح میں کچھ وجوہات کی بنا پر نہیں پہنچ سکا، لڑکے کے ماموں نے وکالت اور ولی ہونے کی حثیت سے لڑکے کی طرف سے ایجاب اور قبول کر لیا، پھر نکاح خواں نے نکاح کا خطبہ پڑھ لیا۔
اگلے دن لڑکے کی جب حاضری ممکن ہوئی تو لڑکے سے اس کے اسی ماموں نے جس وکالت اور گواہوں کے سامنے ایجاب اور قبول کیا تھا،اسی ماموں نے لڑکے سے تین دفعہ ایجاب اور قبول کروایا، تین دفعہ لڑکے سے پوچھا کہ اتنے حق مہر کے ساتھ فلاں لڑکی آپ کو قبول ہے؟ لڑکے نے تینوں دفعہ قبول کیا، لیکن دوسرے دن خطبہ نہیں ہوا، اور نکاح نامہ پر لڑکے نے دستخط کر دیے۔
معلوم یہ کرنا ہے کہ کیا یہ نکاح درست ہے؟

جواب: نکاح میں لڑکا اور لڑکی دونوں کو اپنا وکیل بنانے کا اختیار ہے، اگر دونوں کے وکیل ایک ہی مجلس میں عقدِ نکاح کو انجام دے دیں، تب بھی نکاح منعقد ہوجاتا ہے، لہذا صورت مسئولہ میں لڑکے کے ماموں کا لڑکے کی طرف سے وکیل بن کر ایجاب و قبول کرنے سے نکاح منعقد ہوگیا ہے۔