سوال: مفتی صاحب ! تکبیر تحریمہ اور قرات کے درمیان پڑھی جانے والی دعائیں ارشاد فرمادیں۔

جواب: تکبیر تحریمہ کے بعد عموماً سُبْحَانَكَ اللَّهُمَّ وَبِحَمْدِكَ وَتَبَارَكَ اسْمُكَ، وَتَعَالَى جَدُّكَ، وَلَا إِلَهَ غَيْرَكَ۔ ( اے اللہ ! میں تیری تعریف کے ساتھ، تیری پاکیزگی بیان کرتا ہوں، اور تیرا نام بابرکت ہے، اور تیری شان بلند ہے، اور تیرے سوا کوئی معبود نہیں) پڑھی جاتی ہے، اس کے علاوہ یہ دعائیں بھی نفلی نمازوں میں پڑھی جا سکتی ہیں:

(1) اَللّٰهُمَّ بَاعِدْ بَيْنِي وَبَيْنَ خَطَايَايَ، كَمَا بَاعَدْتَ بَيْنَ المَشْرِقِ وَالمَغْرِبِ، اَللّٰهُمَّ نَقِّنِي مِنَ الخَطَايَا كَمَا يُنَقَّى الثَّوْبُ الأَبْيَضُ مِنَ الدَّنَسِ، اَللّٰهُمَّ اغْسِلْ خَطَايَايَ بِالْمَاءِ وَالثَّلْجِ وَالبَرَدِ.
ترجمہ: اے اللہ ! میرے اور میرے گناہوں کے درمیان ایسی دوری کردے، جیسا کہ تو نے مشرق اور مغرب کے درمیان دوری کر رکھی ہے۔
اے اللہ ! مجھے میرے گناہوں سے ایسا صاف فرما، جیسا کہ سفید کپڑا میل سے صاف کیا جاتا ہے۔
اے اللہ ! مجھ سے میرے گناہ برف، پانی اور اولوں کے ساتھ دھو دے۔
(صحيح البخاري، بَابُ مَا يَقُولُ بَعْدَ التَّكْبِيرِ، رقم الحديث: 744)
(2) وَجَّهْتُ وَجْهِيَ لِلَّذِي فَطَرَ السَّمَاوَاتِ وَالْأَرْضَ حَنِيفًا، وَمَا أَنَا مِنَ الْمُشْرِكِينَ، إِنَّ صَلَاتِي، وَنُسُكِي، وَمَحْيَايَ، وَمَمَاتِي لِلَّهِ رَبِّ الْعَالَمِينَ، لَا شَرِيكَ لَهُ، وَبِذَلِكَ أُمِرْتُ وَأَنَا مِنَ الْمُسْلِمِينَ، اَللّٰهُمَّ أَنْتَ الْمَلِكُ لَا إِلَهَ إِلَّا أَنْتَ أَنْتَ رَبِّي، وَأَنَا عَبْدُكَ، ظَلَمْتُ نَفْسِي، وَاعْتَرَفْتُ بِذَنْبِي، فَاغْفِرْ لِي ذُنُوبِي جَمِيعًا، إِنَّهُ لَا يَغْفِرُ الذُّنُوبَ إِلَّا أَنْتَ، وَاهْدِنِي لِأَحْسَنِ الْأَخْلَاقِ لَا يَهْدِي لِأَحْسَنِهَا إِلَّا أَنْتَ، وَاصْرِفْ عَنِّي سَيِّئَهَا لَا يَصْرِفُ عَنِّي سَيِّئَهَا إِلَّا أَنْتَ، لَبَّيْكَ وَسَعْدَيْكَ وَالْخَيْرُ كُلُّهُ فِي يَدَيْكَ، وَالشَّرُّ لَيْسَ إِلَيْكَ، أَنَا بِكَ وَإِلَيْكَ، تَبَارَكْتَ وَتَعَالَيْتَ، أَسْتَغْفِرُكَ وَأَتُوبُ إِلَيْكَ۔
ترجمہ: میں نے پوری طرح یکسو ہو کر اپنا رخ اس ذات کی طرف کرلیا ہے، جس نے آسمانوں اور زمین کو پیدا کیا ہے، اور میں شرک کرنے والوں میں سے نہیں ہوں۔
یقیناً میری نماز، میری قربانی، میری زندگی اور میری موت اللہ کے لیے ہے، جو تمام جہانوں کا پروردگار ہے، اس کا کوئی شریک نہیں، اور مجھے اسی بات کا حکم ہوا ہے، اور میں اللہ کے فرمانبرداروں میں سے ہوں۔
اے اللہ ! تو ہی بادشاہ ہے، تیرے سوا کوئی معبود نہیں، تو میرا رب ہے، اور میں تیرا بندہ ہوں، میں نے اپنے آپ پر ظلم کیا، اور میں نے اپنے گناہوں کا اعتراف کیا، پس تو میرے سب گناہ معاف فرمادے، بیشک تیرے سوا کوئی گناہ معاف نہیں کر سکتا، اور بہترین اخلاق کی طرف میری رہنمائی فرما، تیرے سوا کوئی بھی بہترین اخلاق کی طرف رہنمائی نہیں کر سکتا، اور مجھ سے سب برے اخلاق ہٹادے، کہ تیرے سوا کوئی بھی مجھ سے برے اخلاق نہیں ہٹا سکتا۔
میں آپ کی بارگاہ میں حاضر ہوں، اور تمام تر بھلائی تیرے ہی ہاتھوں میں ہے، اور برائی تیرا رخ نہیں کر سکتی، میں تیرا ہی محتاج ہوں، اور تیری ہی طرف رخ کرتا ہوں، تو برکت والا اور بلندی والا ہے، میں تجھ سے مغفرت مانگتا ہوں، اور تیرے سامنے توبہ کرتا ہوں۔
(صحيح مسلم، بَابُ الدُّعَاءِ فِي صَلَاةِ اللَّيْلِ وَقِيَامِهِ، رقم الحديث: 1812)
(3) اللهُ أَكْبَرُ كَبِيرًا، وَالْحَمْدُ لِلَّهِ كَثِيرًا، وَسُبْحَانَ اللهِ بُكْرَةً وَأَصِيلًا۔
ترجمہ: اللہ بڑا ہے، سب سے بڑا، اور تعریف اللہ کی ہے بہت زیادہ، اور ہم صبح و شام اللہ کی پاکی بیان کرتے ہیں۔
(صحيح مسلم، بَابُ مَا يُقَالُ بَيْنَ تَكْبِيرَةِ الْإِحْرَامِ وَالْقِرَاءَةِ، رقم الحديث: 1358)