سوال: مفتی صاحب ! اگر کوئی شخص اپنی بیوی سے کہے کہ اگر تم فلاں سے ملیں یا بات کی تو میری طرف سے تین طلاق ہے، اگر وہ عورت غلطی یا جان بوجھ کر اس فلاں سے مل لے یا بات کرلے، تو کیا طلاق واقع ہو جائے گی؟ یا وہ شخص اپنی بات پر شرمندہ ہو کر طلاق واپس لینا چاہتا ہو، تو کیا شریعت میں اس کی گنجائش ہے؟

جواب:
واضح رہے کہ طلاق اگر کسی شرط کے ساتھ معلق کرکے دی جائے تو شرط پوری ہونے پر طلاق واقع ہو جائے گی، چاہے وہ شرط غلطی سے پوری ہوجائے یا جان بوجھ کر پوری ہو، اور طلاق کو ایک مرتبہ کسی شرط کے ساتھ معلق کر دینے کے بعد شوہر کو واپس لینے کا اختیار نہیں ہوتا، لہذا وہ طلاق بدستور اس شرط کے ساتھ معلق رہے گی اور شوہر کی اجازت دے دینے کے بعد بھی شرط ختم نہیں ہوگی، بلکہ جب بھی آپ کی بیوی سے وہ شرط پوری ہوگی تو آپ کی بیوی پر طلاق واقع ہو جائے گی، لہذا آپ کی بیوی کو طلاق سے بچنے کے لیے ضروری ہے کہ آئندہ اس کام سے بالکل اجتناب کرے۔
البتہ تین طلاقوں سے بچنے کی ایک صورت یہ ہوسکتی ہے کہ آپ اپنی بیوی کو ایک طلاق دے دیں، اور آپ کی بیوی اس کی عدت گزار لے، پھر آپ کی بیوی وہ شرط پوری کرلے (یعنی فلاں سے مل لے یا بات کرلے)، پھر آپ اس کے بعد نئے مہر کے ساتھ نکاح کرلیں، اس صورت میں شرط بھی پوری ہوجائے گی، اور آپ کی بیوی آپ کے لئے حرام ہونے سے بھی بچ جائے گی۔
واضح رہے کہ اس صورت کو اختیار کرنے کے بعد اگر بعد میں دوبارہ وہ شرط پائی جاتی ہے تو طلاق واقع نہیں ہوگی، اور اب آپ کو آئندہ صرف دو طلاقوں کا اختیار ہوگا۔