سوال: پوچھنا یہ ہے کہ نذر کے لئے مرچیں جلائی جاتی ہیں اور یہ خیال کیا جاتا ہے کہ اگر دھواں نکلے تو نظر نہیں ہے اور دھواں نہ نکلے تو نظر ہے، کیا اس کی کوئی حقیقت ہے؟

جواب: واضح رہے کہ نظر بد سے حفاظت کے لیے حدیث مبارکہ میں مندرجہ ذیل دعا کا ذکر ملتا ہے:أَعُوذُ بِكَلِمَاتِ اللهِ التَّامَّةِ مِنْ كُلِّ شَيْطَانٍ وَهَامَّةٍ ، وَمِنْ كُلِّ عَيْنٍ لاَمَّةٍ.ترجمہ:میں الله کے مکمل کلمات کے ذریعے پناہ لیتا ہوں، ہر ایک شیطان سے اور ہر زہریلے جانور سے اور ہر نقصان پہنچانے والی آنکھ سے۔(صحیح بخاری، حدیث نمبر:3371)
فضیلت: حدیث شریف میں ہے کہ حضور اکرم ﷺ حضرت حسن اور حسین رضی اللہ عنہما پر یہ کلمات پڑھا کرتے تھے، اسی طرح حضرت ابراہیم علیہ السلام بھی حضرت اسماعیل اور حضرت اسحاق علیہما السلام پر انہیں کلمات کو پڑھا کرتے تھے۔
البتہ نظر بد اتارنے کے بعض علاج اوربھی ہیں، مذکورہ علاج جس کا سوال میں ذکر کیا گیا ہے، اگر بطور علاج کیا جائے اور اسے سنت، واجب، ثواب یا عبادت سمجھ کر نہ کیا جائے تو دیگر امراض کے علاج کی طرح اسے بھی بطور علاج کرنے میں کوئی حرج نہیں ہے، بشرطیکہ اس میں کوئی خلافِ شرع عقیدہ یا عمل نہ پایا جائے۔