سوال: السلام علیکم،
ایک مچھلی ہے، جسے بنگلہ زبان میں 'الیش' کہتے ہیں، ماہرین کی ہدایت کے مطابق حکومت نے مخصوص ایام ( مچھلی کے انڈا دینے اور نشو ونما کے وقت ) میں اس مچھلی کو شکار کرنے سے منع کیا ہے، اس پابندی سے اس مچھلی کی پیداور میں کئی برس سے اچھا خاصہ اضافہ بھی ہوا ہے، لیکن کچھ لوگ خلافِ قانون اس وقت بھی مچھلی پکڑتے ہیں، حکومت جب ان لوگوں کو پکڑتی ہے، تو ان سے مچھلی چھین کر یتیم خانہ اور مدارس میں دیدیتی ہے۔
اس ضمن میں چند سوالات کے جوابات مطلوب ہیں:
1۔ اگر کسی نے ممنوع وقت میں مچھلی شکار کر لی تو کیا وہ اس مچھلی کا مالک ہوگا یا نہیں؟
2۔ کیا ایسا مچھلی خریدنا شرعاً جائز ہوگا؟
3۔ کیا اربابِ مدرسہ کیلیے حکومت سے ایسی مچھلی لینا جائز ہوگا؟
4- کیا مدرسہ کے طلبہ کیلیے ایسی مچھلی کھانا جائز ہوگا؟ نیز کیا غریب اور مالدار ہونے کی حیثیت سے ان کے حکم میں فرق ہوگا؟ اساتذہ کو ایسی مچھلی کھلانا اور کھانا جائز ہوگا؟

جواب: 1- واضح رہے کہ اگراسلامی مملکت عام مسلمانوں کے مفاد کی خاطر کسی جائز کام پر وقتی طور پر پابندی عائد کردے٬ تو ملک کے باشندوں پر اس کی پابندی شرعاً بھی لازم ہوجاتی ہے٬ لہذا جن مخصوص ایام میں مچھلی کے شکار قانونا منع ہو٬ تو ان دنوں میں شکار کرنا شرعا بھی درست نہیں ہے٬ وگرنہ ایک جائز قانون کی خلاف ورزی کا گناہ ہوگا٬ تاہم شکار کرنے سے شکار کرنے والا وہ مچھلی کا مالک بن جائے گا۔
2- خلاف قانون شکار کی گئی مچھلی کی خریداری فی نفسہ جائز ہے٬ لیکن اگر اس کی خرید وفروخت پر بھی قانونا پابندی ہو٬ تو پھر اس کی خرید و فروخت بھی شرعا درست نہیں ہوگی.
3٬4- حکومت کی طرف سے خلاف قانون شکار کی گئی مچھلی کو ضبط کرنا مالی جرمانے (تعزیر بالمال) میں داخل ہے٬ جو اصل مذہبِ حنفی کے مطابق جائز نہیں، لیکن امام ابو یوسف رحمہ اللہ کی ایک روایت، بعض فقہاء حنفیہ اورفقہاء مالکیہ کی آراء اور امام ابن تیمیہ اور امام ابن قیم رحمہم اللہ کے مذہب کے مطابق اس کی گنجائش ہے٬ جس سے اس مسئلہ کا فی الجملہ مجتہد فیہ ہونا واضح ہوتا ہے،اور اگر کوئی قاضی اسلامی مملکت کی مصلحت کے مطابق مجتہد فیہ معاملے میں میں خلافِ مذہب فیصلہ کردے٬ تو وہ چونکہ قضاءً نافذ ہوجاتاہے٬ اس لیے یہاں بھی اگر حکومت انتظامی مصلحت کے پیشِ نظر تعزیر بالمال کا حکم نافذ کردے٬ تویہ تعزیر بالمال قضاءً بہرحال نافذ ہوجائی گی٬ اور وہ ضبط شدہ مال بیت المال کی ملکیت میں داخل ہوجائے گا٬ جسے حکومت اپنی صوابدید کے مطابق درست مصارف میں خرچ کرسکتی ہے٬ لہذا ارباب مدارس کیلئے حکومت سے ایسی مچھلی لینا اور اسے استعمال کرنا جائز ہے٬ نیز طلباء (خواہ مالدار ہوں یا غریب) اور اساتذہ کا اسے استعمال کرنا بھی جائز ہے۔