سوال: مفتی صاحب ! کوئی ایسی دعا بتائیں، جب اس کے ذریعے سے کوئی دعا کی جائے، تو وہ دعا قبول ہوجائے۔

جواب: ایسی دعائیں جس کے ذریعے تمام دعائیں قبول ہوتی ہیں:
(1) اَللّٰهُمَّ إِنِّي أَسْأَلُكَ بِاسْمِكَ الطَّاهِرِ الطَّيِّبِ الْمُبَارَكِ الْأَحَبِّ إِلَيْكَ، الَّذِي إِذَا دُعِيتَ بِهِ أَجَبْتَ، وَإِذَا سُئِلْتَ بِهِ أَعْطَيْتَ، وَإِذَا اسْتُرْحِمْتَ بِهِ رَحِمْتَ، وَإِذَا اسْتُفْرِجَتَ بِهِ فَرَّجْتَ
ترجمہ: اے اللہ! میں تجھ سے تیرے اس طاہر، طیب، برکت والے اور تجھے سب سے پیارے نام کے واسطے سے سوال کرتا ہوں، جس کے وسیلے سے جب تجھ سے دعا کی جائے، تو تو قبول فرماتا ہے اور جب تجھ سے اس کے وسیلے سے کچھ مانگا جائے، تو تو عطا فرماتا ہے اور جب تجھ سے اس کے واسطے سے رحمت طلب کی جائے، تو تو رحمت فرماتا ہے اور جب تجھ سے اس کے واسطے سے پریشانی دور کرنے کی درخواست کی جائے، تو تو پریشانی دور کرتا اور مشکل کشائی فرماتا ہے۔

(2) اَللّٰهُمَّ إِنِّي أَدْعُوكَ اللَّهَ، وَأَدْعُوكَ الرَّحْمَنَ، وَأَدْعُوكَ الْبَرَّ الرَّحِيمَ، وَأَدْعُوكَ بِأَسْمَائِكَ الْحُسْنَى كُلِّهَا، مَا عَلِمْتُ مِنْهَا، وَمَا لَمْ أَعْلَمْ، أَنْ تَغْفِرَ لِي وَتَرْحَمَنِي۔
ترجمہ: اے اللہ ! میں تجھے اللہ پکارتا ہوں، میں تجھے رحمان کے نام سے پکارتا ہوں، اور میں تجھے برّ رحیم پکارتا ہوں، میں تجھے تیرے تمام اچھے ناموں کے ذریعے پکارتا ہوں، جو نام مجھے معلوم ہیں اور جو معلوم نہیں (ان سب ناموں کا واسطہ دے کر دعا کرتا ہوں) کہ تو میری مغفرت فرمادے اور مجھ پر رحم فرما۔
(سنن ابن ماجة، بَابُ اسْمِ اللَّهِ الْأَعْظَمِ، رقم الحديث: 3859)

(3) لاَ إِلَهَ إِلاَّ أَنْتَ سُبْحَانَكَ إِنِّي كُنْتُ مِنَ الظَّالِمِينَ۔
ترجمہ: (یا اللہ ! ) تیرے سوا کوئی معبود نہیں، تو ہر عیب سے پاک ہے، بیشک میں قصور وار ہوں۔
فضیلت: رسول کریم صلی اللہ علیہ وسلم نے فرمایا: "مچھلی والے (یعنی حضرت یونس علیہ السلام) کی وہ دعا جو انہوں نے مچھلی کے پیٹ میں اپنے پروردگار سے مانگی تھی، جو مسلمان شخص اس دعا کے ذریعہ اللہ سے کوئی چیز مانگتا ہے، تو اللہ تعالیٰ اس کا سوال پورا کرتا ہے۔
(جامع الترمذي، رقم الحديث: 3505)

(4) اَللّٰهُمَّ لاَ إِلَهَ إِلاَّ أَنْتَ الْمَنَّانُ بَدِيعُ السَّمَوَاتِ وَالأَرْضِ ذَا الجَلاَلِ وَالإِكْرَامِ
ترجمہ: اے اللہ ! آپ کے سوا کوئی معبود نہیں، آپ ہی احسانِ عظیم فرمانے والے ہیں، اے آسمانوں اور زمین کو انوکھے انداز میں پیدا کرنے والے ! اے عظمت و بزرگی اور اکرام و احسان والے !
فضیلت: حدیث شریف میں آتا ہے کہ رسول اللہ صلی اللہ علیہ وسلم نے فرمایا: جب اس کے ذریعہ دعا کی جاتی ہے، تو اللہ اسے قبول فرماتا ہے، اور جب اس کے ذریعہ کوئی چیز مانگی جاتی ہے، تو اللہ اسے وہ چیز عنایت فرماتا ہے۔
(جامع الترمذي، رقم الحديث: 3544)

(5) يَا ذَا الجَلاَلِ وَالإِكْرَامِ
ترجمہ: اے عظمت و بزرگی والے !
(جامع الترمذي، رقم الحديث: 3525)

(6) اَللّٰهُمَّ إِنِّي أَسْأَلُكَ بِأَنِّي أَشْهَدُ أَنَّكَ أَنْتَ اللَّهُ لاَ إِلَهَ إِلاَّ أَنْتَ الأَحَدُ الصَّمَدُ، الَّذِي لَمْ يَلِدْ وَلَمْ يُولَدْ وَلَمْ يَكُنْ لَهُ كُفُوًا أَحَدٌ۔
ترجمہ: اے اللہ ! میں تجھ سے سوال کرتا ہوں، اس طور پر کہ میں گواہی دیتا ہوں کہ تو ہی اللہ ہے، تیرے سوا کوئی معبود نہیں، تو یکتا بے نیاز ہے، جس کی نہ کوئی اولاد ہے، اور نہ وہ کسی کی اولاد ہے، اور اس کے جوڑ کا کوئی نہیں۔
فضیلت: حدیث شریف میں آتا ہے کہ رسول اللہ صلی اللہ علیہ وسلم نے ایک شخص کو ان الفاظ کے ساتھ دعا مانگتے ہوئے سنا، تو آپ صلی اللہ علیہ وسلم نے فرمایا: اس نے اللہ سے اس کے اسمِ اعظم کے ذریعے دعا مانگی ہے، جب اس کے ذریعے دعا کی جاتی ہے، تو اللہ اسے قبول فرماتا ہے، اور جب اس کے ذریعہ کوئی چیز مانگی جاتی ہے، تو اللہ اسے وہ چیز عنایت فرماتا ہے۔
(جامع الترمذي، بَابُ جَامِعِ الدَّعَوَاتِ عَنِ النَّبِيِّ صَلَّى اللَّهُ عَلَيْهِ وَسَلَّمَ، رقم الحديث: 3475)

(7) اَللّٰهُمَّ إِنِّي أَسْأَلُكَ بِأَنَّ لَكَ الْحَمْدُ، لَا إِلَهَ إِلَّا أَنْتَ الْمَنَّانُ، بَدِيعُ السَّمَوَاتِ وَالْأَرْضِ، يَا ذَا الْجَلَالِ وَالْإِكْرَامِ، يَا حَيُّ يَا قَيُّومُ۔
ترجمہ: اے اللہ ! میں تجھ سے اس وسیلے کے ساتھ مانگتا ہوں کہ تمام تعریفیں تیرے لیے ہیں، تیرے علاوہ کوئی معبود نہیں، تو بہت مہربان، بہت دینے والا اور آسمانوں اور زمین کا پیدا کرنے والا ہے، اے بزرگی اور بخشش کے مالک ! اے سدا زندہ ! اے پوری کائنات سنبھالے ہوئے !
فضیلت: حدیث شریف میں آتا ہے کہ رسول اللہ صلی اللہ علیہ وسلم نے فرمایا: جب اس کے ذریعے دعا کی جاتی ہے، تو اللہ اسے قبول فرماتا ہے، اور جب اس کے ذریعے کوئی چیز مانگی جاتی ہے، تو اللہ اسے وہ چیز عنایت فرماتا ہے۔
(سنن لابي داود، بَابُ الدُّعَاءِ، رقم الحديث: 1495)