سوال: ہمارے علاقہ میں بعض لوگ ایسے ہیں کہ وہ کسی رمضان کے مہینہ میں ایک روزہ بھی نہیں رکھتے ہیں اور اس پر مزید یہ کہ لوگوں کے سامنے کھلے عام کھاتے پیتے رہتے ہیں، جیسے کہ رمضان کا مہینہ نہ ہو، بلکہ عام مہینہ ہو، ان جیسے لوگوں کے بارے میں شریعت کا کیا حکم ہے؟

جواب: جو لوگ رمضان کے مہینہ میں بغیر کسی شرعی عذر کے روزہ نہیں رکھتے ہیں اور لوگوں کے سامنے کھلے عام کھاتے پیتے ہیں، تو یہ لوگ اگر رمضان المبارک کے روزوں کا انکار کرتے ہیں یا روزوں کو معمولی سمجھتے ہیں اور مذاق اڑانے کی غرض سے کھاتے پیتے ہیں، تو اس صورت میں یہ لوگ مرتد یعنی دائرہ اسلام سے خارج شمار ہوں گے۔
اور اگر مذکورہ لوگ روزوں کو معمولی نہیں سمجھتے ہیں اور مذاق اڑانے کی غرض سے نہیں کھاتے ہیں، تو یہ لوگ گناہ گار شمار ہوں گے اور تعزیر یعنی سزا کے مستحق ہوں گے اور وقت کے سربراہِ مملکت اور اس کے ماتحت اثر و رسوخ رکھنے والوں کے لئے ضروری ہے کہ مذکورہ لوگوں کو ہاتھ سے روکیں اور علماء کرام زبان سے انہیں نصیحت کے ذریعہ منع کریں اور اگر یہ دونوں کام نہ ہوسکیں، تو ہر ایمان رکھنے والے شخص کا فریضہ ہے کہ مذکورہ لوگوں کو نرمی سے سمجھائے، ورنہ کم از کم ان کے فعل کو دل سے برا سمجھے۔