سوال: السلام علیکم، حضرت ! سوال یہ ہے کہ میں نے رخصتی سے پہلے بغیر خلوت صحیحہ کے کہا کہ بس میں یہ معاملہ ختم کرتا ہوں، بس میں اسے آزاد کرتا ہوں، اس کے بعد 3 دفعہ پھر یہی لفظ بولا کہ میں اسے آزاد کرتا ہوں، ایک دو منٹ بعد پھر کہا کہ بس میں یہ معاملہ ختم کرتا ہوں، میں اسے طلاق دیتا ہوں، طلاق، طلاق، طلاق۔
اس میں کتنی طلاق واقع ہوگئیں؟ رہنمائی فرمادیں۔ جزاک الله

جواب: صورت مسئولہ میں آپ کا یہ کہنا کہ "میں یہ معاملہ ختم کرتا ہوں" طلاق کنایہ کے الفاظ ہیں، ان الفاظ سے اگر آپ کی نیت طلاق کی تھی تو ایک طلاق بائن واقع ہوجائے گی، اور آپ کی بیوی آپ پر حرام ہو جائے گی، اور چونکہ یہ طلاق رخصتی سے قبل ہوئی ہے اس لیے ایک طلاق بائن کے بعد عورت طلاق کا محل نہیں رہی، لہذا اس کے بعد طلاق کے باقی تمام الفاظ لغو ہوجائیں گے، اور خلوت صحیحہ سے قبل طلاق ہونے کی وجہ سے عورت پر عدت گزارنا لازم نہیں ہوگا، البتہ آپ پر نصف مہر ادا کرنا لازم ہوگا۔