سوال: میرے شوہر نے غصے میں میری طرف دیکھتے ہوئے کہا میری طرف سے تمہیں طلاق، طلاق، طلاق ہے، لیکن اس نے میرا نام نہیں لیا تھا، تو کیا طلاق ہو گئی ہے؟

جواب: صورت مسئولہ میں آپ کے شوہر کے اس جملے "تمہیں طلاق، طلاق، طلاق ہے" سے تین طلاقیں واقع ہو کر حرمتِ مغلظہ ثابت ہوگئی ہے، اور آپ اپنے شوہر کے لیے حرام ہوگئی ہیں، اور رجوع کا حق بھی ختم ہو گیا ہے، اگرچہ طلاق دیتے وقت شوہر نے آپ کا نام نہیں لیا۔
تین طلاقیں دینے کی صورت میں عدت کے دوران رجوع کا حق باقی نہیں رہتا ہے، اور نہ ہی عدت گزرنے کے بعد اس شوہر سے نکاح ہو سکتا ہے، جب تک عورت کسی اور مرد سے نکاح نہ کرے اور اس کے ساتھ حقوق زوجیت ادا نہ کرے، پھر اگر وہ طلاق دے یا انتقال کر جائے، تو عدت گزرنے کے بعد طرفین کی رضامندی سے نئے مہر اور دو گواہوں کی موجودگی میں اسی شخص سے دوبارہ نکاح کیا جا سکتا ہے۔