سوال: میری پیٹھ پر دانا ہے جس سے خون نکلتا رہتا ہے اس صورت میں میرے لیے وضو کا کیا حکم ہوگا؟

جواب: اگر پیٹھ کے دانے سے خون مسلسل اس طرح بہتا رہے کہ ایک فرض نماز کے پورے وقت میں اتنا بھی موقع نہ مل سکے کہ آپ اس میں پاک اور باوضو ہو کر فرض نماز ادا کر سکیں تو اس صورت میں آپ شرعاً معذور کے حکم میں ہونگے، اور معذور شرعی کا حکم یہ ہے کہ ایک نماز کے وقت میں وضو کرکے اس وضو سے نماز کا وقت ختم ہونے تک جتنے چاہیں فرائض، سنن اور نوافل وغیرہ ادا کرسکتے ہیں، وقت کے ختم ہوتے ہی وضو ٹوٹ جائے گا، بشرطیکہ اس دوران کوئی دوسرا ناقض وضو نہ پایا جائے، اب اگلی نماز کے لیے دوبارہ وضو کرنا پڑے گا اور اگر خون اس طرح مسلسل نہیں بہتا، بلکہ وقفے وقفے سے بہتا ہے تو شرعی معذور نہ ہونے کی وجہ سے ہر دفعہ خون نکلنے پر وضو کرنا لازم ہوگا۔
یاد رہے کہ ایک دفعہ معذور بننے کے بعد یہ شخص اس وقت تک معذور شمار کیا جائے گا، جب تک کہ ایک نماز کے مکمل وقت میں کم از کم ایک مرتبہ یہ عذر پایا جائے۔