سوال: حضرت! جس طرح ہم دیکھتے ہیں کہ مہنگے سے مہنگا خوبصورت جانور منڈی میں آتا ہے، مہنگے خوبصورت جانور خریدنے کی شرعی حیثیت کیا ہے؟ نیز یہ کہ کتنا زیادہ مہنگا جانور نہیں لینا چاہیے؟ کیونکہ بعض لوگوں کو یہ کہتے ہوئے سنا گیا ہے کہ دو چار ہلکے کم خوبصورت جانور لینے چاہیں، نہ کہ مہنگے۔ براہ کرم آپ صحیح رہنمائی فرمادیں۔

جواب: قربانی کے لیے جانور خریدنے کے حوالے سے تفصیل ذیل میں ذکر کی جاتی ہے:
۱) اگر ضرورت مند لوگ زیادہ ہوں تو زیادہ گوشت والا جانور افضل ہے، ورنہ ایسا جانور جو فربہ اور موٹا ہو اور اس کی قیمت زیادہ اور گوشت عمدہ ہو تو وہ افضل ہے۔
۲) اگر بڑے جانور گائے وغیرہ کے ساتویں حصہ کی قیمت اور بکری کی قیمت برابر اور گوشت بھی برابر ہے تو بکری خریدنا افضل ہے، پھر بھیڑ کی قربانی بکری سے اور مادہ کی قربانی نر سے افضل ہے۔
۳) جس قربانی کی قیمت زیادہ ہو، وہ بہتر ہے اور اگر دو جانوروں کی قیمت برابر ہو، لیکن ایک کا گوشت زیادہ ہے تو یہی جانور بہتر اور افضل ہے۔
۴) جس قیمت میں دو مناسب جانور خریدنا ممکن ہو تو بہتر یہی ہے کہ اس قیمت میں ایک موٹا اور فربہ جانور خریدنے کے بجائے دو مناسب جانور ہی خریدے جائیں، کیونکہ دو واجبات کی ادائیگی بہرحال ایک واجب کی ادائیگی سے بہتر ہے۔