سوال: اگر کوئی شخص اس لڑکی سے جس سے اس کے گھر والوں کی رضامندی سے منگنی ہوچکی ہے، مسلمان مرد عاقل بالغ کے سامنے ایجاب قبول کر لے تو کیا بعد میں سب کے سامنے نکاح کرنے میں کوئی نقصان تو نہیں ہوگا؟

جواب: صورت مسئولہ میں اگر بالغ لڑکا لڑکی گواہوں (دو مسلمان عاقل بالغ مردوں یا ایک مرد اور دو عورتوں) کی موجودگی میں اپنی رضامندی سے نکاح کرلیں، تو اگرچہ نکاح ہوجائے گا، لیکن چھپ کر نکاح کرنا کئی مفاسد کی وجہ سے اچھا نہیں ہے، خصوصاً آپس میں ملنے میں نامحرم سے ملاقات کی تہمت کا قوی اندیشہ ہے۔
واضح رہے کہ پہلا نکاح ہوجانے کے بعد دوبارہ نکاح کرنے کی ضرورت نہیں ہے، لیکن صورت مسئولہ میں پہلا نکاح چونکہ چھپ کر کیا جارہا ہے، لہذا لڑکا لڑکی کے والدین اور دیگر رشتہ داروں کو نکاح پر مطلع کرنے کے لیے دوبارہ اعلانیہ نکاح کرنا ممنوع نہیں ہے۔