سوال: کیا amazon اور aliexpress میں drop shipping کا کاروبار کرنا جائز ہے؟

جواب: ڈراپ شپنگ (drop shipping) اور ایمازون (Amazon) وغیرہ کے ذریعے آن لائن کاروبار کا عام طور پر طریقہ یہ ہوتا ہے کہ فروخت کنندہ (seller) مختلف چیزوں (products) کی تصاویر اور تمام تفصیلات اپنی ویب سائٹ پر یا اپنے پیج پر لگاتا ہے، ویب سائٹ یا پیج دیکھنے والا شخص ان میں سے کسی چیز کو پسند کرنے کے بعد اس پر کلک (click) کرکے اس چیز کو خریدنے کا اظہار کرتا ہے، اور خریداری کا آرڈر دیتا ہے، پھر اس کے فراہم کے کردہ ایڈریس پر وہ چیز ڈلیور (deliver) کردی جاتی ہے۔
اس طریقہ کار میں فروخت کی جانے والی چیز (product) عموما فروخت کنندہ (seller) کی ملکیت میں نہیں ہوتی، فروخت کنندہ اپنے گاہک (customer) سے خریداری کا آرڈر پہلے وصول کر لیتا ہے، پھر بعد میں کسی کمپنی یا ہول سیلر سے وہ چیز خرید کر اپنے گاہک کو بھیج (deliver) دیتا ہے، نیز یہاں فروخت کی جانے والی چیز قبضہ سے پہلے بھی فروخت کردی جاتی ہے۔
جبکہ شریعت کی رو سے کسی ایسی چیز کو فروخت کرنا جائز نہیں، جو فروخت کرنے والے شخص کی ملکیت (ownership) اور قبضہ (possession) میں نہ ہو۔
لہذا جن چیزوں کا اسٹاک خود اس آن لائن اسٹور والے شخص کے پاس موجود ہو، اور وہ چیزیں اس کی ملکیت اور قبضے میں ہوں، تو ان چیزوں کو آرڈر ملنے پر بیچا جاسکتا ہے، مگر جو چیزیں اس کی ملکیت اور قبضہ میں نہ ہوں، تو ایسی چیزوں کے بارے میں پہلے فروختگی (sale) کا معاملہ حتمی (confirm) کر کے بعد میں مارکیٹ سے خرید کر اپنے کسٹمر کو ڈیلور کرنا شرعا درست نہیں۔
البتہ درج ذیل صورتوں میں سے کوئی صورت اختیار کرلی جائے، تو یہ کاروبار جائز ہوسکتا ہے:
1) گاہک کو مطلوبہ چیز (Product) فروخت کرنے سے پہلے فروخت کنندہ (Seller) سے وہ چیز خرید لی جائے، خریدنے کے بعد اگر خود اپنے کسی وکیل (agent) کے ذریعے اس چیز پر قبضہ کرلے (قبضہ چاہے حسی ہو یا معنوی) اس کے بعد وہ اپنے کسٹمر کو وہ چیز فروخت کردے، تو اس طریقہ سے خرید و فروخت کا معاملہ درست ہوجائے گا۔
2) متعلقہ ہول سیلر یا کمپنی کا بروکر یا ایجنٹ بن کر اس کی چیز فروخت کردے، اور اس کا کام کے عوض طے شدہ رقم یا فیصد کے اعتبار سے کمیشن طے کرلیا جائے کہ فی آئٹم فروخت کرنے پر میرا اتنا کمیشن ہوگا، تو اس طریقہ سے بھی خرید و فروخت کا یہ معاملہ شرعا درست ہوجائے گا۔