سوال: مفتی صاحب ! میری بیوی کو پریگنینسی کا آٹھواں مہینہ چل رہا ہے، ڈاکٹرز نے الٹراساؤنڈ میں بتایا ہے کہ بچے کا پانی کم ہے اور بچہ الٹا ہے، اس لئے آپریشن کرنا پڑے گا۔ براہ مہربانی کوئی وظیفہ بتائیں کہ جس سے بچہ سیدھا ہوجائے اور پریگنینسی بھی آسان ہو جائے۔

جواب: واضح رہے کہ وضع حمل کے وقت کسی خاص سورت کی تلاوت کرنا احادیث سے ثابت نہیں ہے، البتہ درج ذیل اعمال کو مختلف حاجات کے لئے پڑھنا احادیث سے ثابت ہے، لہذا ان کا اہتمام کریں، ان شاء اللہ! اللہ تعالی ولادت میں آسانی پیدا فرمادیں گے۔
1) صلاة الحاجة پڑھنے کا اہتمام کیا جائے، حدیث میں ہے:
"جس کسی کو کوئی حاجت در پیش ہو، خواہ اللّٰہ سے یا لوگوں سے، تو اسے چاہیے کہ (خوب اچھی طرح) وضو کرے، پھر دو رکعت نماز پڑھے، اس کے بعد اللہ تعالیٰ کی حمد و ثنا کرے، اور درود شریف پڑھے، پھر یہ دعا کرے":
'' لَا اِلٰـهَ اِلَّا اللّٰهُ الْحَلِیْمُ الْکَرِیْمُ، سُبْحَانَ اللّٰهِ رَبِّ الْعَرْشِ الْعَظِیْمِ، اَلْحَمْدُ لِلّٰهِ رَبِّ الْعٰلَمِیْنَ، اَسْئَلُکَ مُوْجِبَاتِ رَحْمَتِکَ، وَعَزَائِمَ مَغْفِرَتِکَ، وَالْعِصْمَةَ مِنْ کُلِّ ذَمنْبٍ، وَالْغَنِیْمَةَ مِنْ کُلِّ بِرٍّ، وَّالسَّلَامَةَ مِنْ کُلِّ إِثْمٍ، لَا تَدَعْ لِیْ ذَنْبًا إِلَّا غَفَرْتَه وَلَا هَمًّا إِلَّا فَرَّجْتَه وَلَا حَاجَةً هِيَ لَکَ رِضًا إِلَّا قَضَیْتَهَا یَا أَرْحَمَ الرّٰحِمِیْنَ )''۔
(سنن الترمذی،حدیث نمبر:479)
2)سورۃ یسین پڑھنے کا اہتمام کریں، حدیث میں ہے:
حضور اکرم ﷺ نے فرمایا: "جو شخص دن کے اول حصّہ میں سورہ یٰس پڑھ لیتا ہے، اس کی پورے دن کی ضروریات پوری کردی جاتی ہیں"۔
3) اپنی وسعت کے مطابق صدقہ دینے کا اہتمام کریں، کیونکہ صدقہ بلاؤں اور مصیبتوں کو ٹالتا ہے، حدیث میں ہے:
حضرت ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: "صدقہ دو اور اپنے مریضوں کا صدقہ کے ذریعے علاج کرو، اس لیے کہ صدقہ پریشانیوں اور بیماریوں کو دور کرتا ہے اور وہ تمہارے اعمال اور نیکیوں میں اضافے کا سبب ہے"۔
(شعب الإيمان،رقم الحدیث:3278)
4) بکثرت استغفار کیا کریں، کیونکہ حدیث شریف میں آتا ہے: حضرت ابن عباس رضی اللہ تعالی عنہما سے روایت ہے کہ آپ ﷺ نے ارشاد فرمایا: "جو کوئی استغفار کو لازم کرلے، اللہ تعالی اس کے لئے ہر تنگی سے نکلنے کا راستہ نکال دیتا ہے، اور اور ہر غم سے خلاصی دے دیتا ہے، اور اللہ تعالی اس کو ایسی جگہ سے روزی دیتا ہے کہ وہ گمان بھی نہیں کرتا۔"
(سنن ابی داؤد،حدیث نمبر:1518)