سوال: السلام علیکم،حضرت ! یہ فرمائیے کہ بچے کی والدہ، بچے کی کسی غلطی کا ذکر بچے کی غیر موجودگی میں بچے کے والد سے کرتی ہے، کبھی اس کے نتیجے میں دونوں بچے کی اصلاح کی فکر کرتے ہیں اور کبھی نہیں کرتے، کیا یہ ذکر کرنا غیبت میں آتا ہے؟
جزاک اللہ خیرا

جواب: اولاد ماں باپ کے پاس اللہ تعالیٰ کی بڑی امانت ہے، بچپن سے ہی ان کی صحیح تربیت کرنا اور ان کو معاشرتی آداب سکھانا والدین کی بہت بڑی ذمہ داری ہے۔
چونکہ والدین ہمیشہ اپنی اولاد کے لیے مخلص اور شفیق ہوتے ہیں، اور ان کا آپس میں اولاد کی تربیت کا تذکرہ کرنا بچوں پر شفقت اور ان کی تربیت کی غرض سے ہی ہوتا ہے، نیز والدین اپنے بچوں کی برائی سن کر اس کو دور کرنے پر بھی قدرت رکھتے ہیں، لہذا والدین کا بچوں کی غیر موجودگی میں اس طرح کا تذکرہ کرنا غیبت میں داخل نہیں ہے، کیونکہ جن صورتوں میں علماء کرام نے غیبت کو جائز قرار دیا ہے، ان میں ایک یہ بھی ہے کہ جو شخص منکر (برے کام) کو ختم کرنے پر قدرت رکھتا ہو، اس کے سامنے اصلاح کی نیت سے برائی کرنے والوں کا تذکرہ کرنا غیبت میں داخل نہیں ہے۔