سوال: السلام علیکم، میری بیگم ناراض ہو کر میکے چلی گئی ہے، وہاں سے پہلے فون پے مجھ سے کہتی رہی ہے کہ مجھے طلاق دو اور اپنی بچیوں کو لے جاؤ۔اب وہ حلف سے کہتی ہے کہ مجھے فلاں فلاں ٹائم طلاق ہو گئی تھی، فون پے بات کی تصدیق کیلے ریکارڈنگ میرے پاس موجود ہے،مگر وہ اور اسکے گھر والے میری بات ماننے کیلے تیار نہیں ہیں۔کیا وہ اگر حلف اٹھا رہی ہو ، اس طرح اسکی بات مان لینی چاہیے کہ نہیں؟میری طرف سے ایسی کوئی طلاق وغیرہ نہیں ہوئی ہے ،میری دو نابالغ بیٹیاں بھی ہیں۔

جواب: اگر طلاق کے بارے میں میاں بیوی دونوں کے درمیان اختلاف ہو جائے، تو شرعی حکم یہ ہے کہ بیوی شوہر کے طلاق دینے پر شرعی گواہ (دو مرد یا ایک مرد اور دو عورتیں) پیش کرے، اگر بیوی شرعی گواہ پیش کردے، تو طلاق واقع ہو جائے گی، اور اگر بیوی گواہ پیش نہ کرسکے، تو شوہر سے طلاق نہ دینے پر قسم لی جائے گی، اگر اس نے طلاق نہ دینے پر قسم اٹھا لی، تو اس صورت میں ظاہری فیصلہ شوہر کے حق میں ہوگا، اور طلاق واقع نہیں ہوگی، لیکن اگر عورت کو تین دفعہ طلاق دینے کا یقین ہو، تو وہ شوہر کو اپنے اوپر قدرت نہ دے، اور اس سے چھٹکارا حاصل کرنے کی پوری کوشش کرے۔